Заява Руху «За свабоду» з нагоды ўдзелу расейцаў у парадзе 3 Ліпеня
Рух «За Свабоду» выказвае рашучы пратэст супраць удзелу расійскіх вайскоўцаў ў парадзе 3 Ліпеня.
Праз свае дзеянні ўлады Беларусі ганебна і папаўзліва робяць нашу краіну дзяржавай-марыянеткай і пляцоўкай для дэманстрацыі сілы расійскай ваеншчыны.
Запрашэнне расійскай арміі на парад у Мінску супярэчыць нейтральнаму статусу Беларусі, ставіць пад пагрозу стабільнасць і дабрабыт беларускага народу, пагражае рэгіянальнай бяспецы.
Расійскія сцягі і чорна-аранжавыя стужкі ў сённяшняй Еўропе і ва ўсім свеце атаясамліваюцца з агрэсіяй супраць суседняй з Беларуссю суверэннай дзяржавы — Украіны. Расійская парадная калона сёння можа значыць наўпроставую акупацыю заўтра. Гэта таксама вядзе да ўцягвання беларусаў у вайну супраць братэрскага ўкраінскага народа.
Нейтральная Беларусь павінна шанаваць сваё войска, захоўваць гістарычную памяць і памятаць урокі Другой Сусветнай вайны. А гэтыя ўрокі кажуць пра тое, што нельга гуляць у небяспечныя гульні з агрэсарам.
Рух «За Свабоду» дапускае ўдзел у парадах у нейтральнай Беларусі вайскоўцаў з іншых краінаў добрай волі.
Такія парады павінны ўмацоўваць рэгіянальную бяспеку і ўзаемапаразуменне. На іх варта запрашаць прадстаўнікоў усіх суседніх краінаў — Украіны, Польшчы, Латвіі, Літвы, Расіі, а таксама дзяржаваў антыгітлераўскай кааліцыі.
Мы ўсведамляем, што такія парады сёння немагчымыя ў аўтарытарнай напаўізаляванай ад цывілізаванага свету Беларусі. Таму мы падзяляем справядлівае абурэнне многіх беларусаў прысутнасцю расійскіх вайскоўцаў, тэхнікі і сімволікі на вуліцах сталіцы нашай краіны.
Рух «За Свабоду» заклікае грамадзянаў Беларусі памятаць пра ўрокі гісторыі і рабіць усё неабходнае, каб Беларусь стала нейтральнай дзяржавай, што будуе прыязныя адносіны з усімі суседзямі.
Па ўласніку «Софтклуба» Сіротку, які сядзіць у СІЗА КДБ, прыляцела і ад Польшчы — на яго крыптабіржу Bynex наклалі санкцыі2
Каментары