9 мая Пхеньян заявіў, што карэйскія вайскоўцы правялі паспяховыя запускі новых балістычных ракет. Паводле афіцыйнай версіі, яны былі запушчаныя з падводных лодак, піша Reuters.
А ў сераду, 20 мая, Паўночная Карэя пахвалілася сваімі магчымасцямі ў вырабе мініяцюрных ядзерных боегаловак, і заявіла, што можа абсталёўваць імі свае ракеты. Аднак амерыканскія вайскоўцы і вайсковыя аналітыкі не прынялі гэтыя заявы ўсур’ёз. У прыватнасці, намеснік старшыні Камітэта начальнікаў штабоў узброеных сіл ЗША адмірал Джэймс Уініфэлд заявіў, што Карэя знаходзіцца «за некалькі гадоў» ад стварэння такой зброі. Фотаздымкі і відэа, якія карэйскія ўлады апублікавалі ў якасці доказу, былі названыя падробкай і працай прапагандыстаў.
Пхеньян і раней часта заяўляў пра навуковыя і ваенныя дасягненні, нічым гэта не пацвярджаючы. Нагадаем, што на парадах у 2012 годзе з’яўляліся дрэнна пабудаваныя макеты ракет, якія выдаваліся за сапраўдныя.
Каментары