Канфлікт, які ўзнік паміж рыбакамі на Дняпры ў Рэчыцкім раёне ў канцы мая, завяршыўся распачынаннем дзвюх спраў — па фактах хуліганства (арт. 339 КК) і супраціўлення работнікам міліцыі (арт. 364 КК).
Трое жыхароў Хойніцкага раёна рыбачылі на беразе ракі, ужываючы спіртныя напоі. Мясцовыя рыбакі праплывалі міма іх на маторнай лодцы, і гасцям падалося, што лодка распужала ўсю рыбу. Завязалася славесная сварка, пасля чаго кампанія з Хойніцкага раёна абстраляла лодку з пнеўматычнай стрэльбы.
Як паведаміў афіцыйны прадстаўнік упраўлення Камітэта дзяржаўных судовых экспертыз па Гомельскай вобласці Руслан Габрылёў, рэчыцкія рыбакі выклікалі міліцыю. Аператыўна-следчая група, якая прыбыла на месца, пры надглядзе кампаніі на беразе ракі знайшла пнеўматычную стрэльбу.
Праваахоўнікі прапанавалі грамадзянам прайсці ў аддзяленне міліцыі. Аднак рыбакі сталі аказваць супраціўленне. У момант, калі мужчын усаджвалі ў машыну, на судмедэксперта, які знаходзіўся ў складзе аператыўна-следчай групы, напала п'яная жанчына з кампаніі рыбакоў і нанесла судмедэксперту лёгкія цялесныя пашкоджанні, што не пацягнулі расстройства здароўя. Як стала вядома, жанчына ўкусіла супрацоўніка Рэчыцкага міжраённага аддзела Камітэта дзяржаўных судовых экспертыз за перадплечча.
«Апошнім часам чым далікатней праваахоўнікі абыходзяцца з грамадзянамі ў падобных сітуацыях, тым часцей сустракаюцца выпадкі грэбавання законнымі патрабаваннямі работнікаў дзяржаўных органаў, якія выяўляюцца ў непадпарадкаванні, а часам і ў распусканні рук. Аднак грамадзяне забываюць, што службовыя асобы абароненыя законам, і раскайвацца потым ужо позна», — пракаментаваў Габрылёў.
Цяпер чытаюць
Па ўласніку «Софтклуба» Сіротку, які сядзіць у СІЗА КДБ, прыляцела і ад Польшчы — на яго крыптабіржу Bynex наклалі санкцыі2
Каментары