Навукоўцы з Аўстралійскага нацыянальнага ўніверсітэта выявілі ў вулканічных пячорах Антарктыды сляды ДНК, якія могуць належаць не вядомым навуцы жывёлам. Гэта можа быць сведчаннем таго, што там кіпіць жыццё. Вынікі даследаванняў апублікаваныя ў часопісе Polar Biology, паведамляе РІАН.
Група навукоўцаў на чале з Кэрыдвен Фрэйзер прыбыла на востраў Роса, адзін з самых паўднёвых на планеце, на тэрыторыі якога знаходзіцца дзейны вулкан Эрэбус. Там яны вывучалі «шырокія і звязаныя адно з адным» падледніковыя пячорныя сістэмы, якія былі ўтвораныя пад уздзеяннем вулканічнае пары.
Узяўшы пробы з розных пячор, навукоўцы выявілі сляды моху, багавіння, круглых чарвякоў і членістаногіх, прычым некаторыя ўзоры ДНК могуць належаць «новым відам жывёл і раслін». Сляды выяўленыя як на паверхні, так і на падлёдных участках.
Па словах Фрэйзера, вынікі даследаванняў адкрываюць «спакуслівы погляд» на тое, што адбываецца пад ільдамі Антарктыды. Яна тлумачыць, што ў геатэрмальных пячорах вельмі добрыя ўмовы для жыцця.
«У гэтых пячорах можа быць па-сапраўднаму цёпла, у некаторых з іх тэмпература можа дасягаць 25 градусаў. Вы можаце хадзіць там у футболцы, і вам будзе камфортна», — адзначае Фрэйзер.
Як адзначае яе калега доктар Лоры Канелі з Універсітэта Мэна, калі навукоўцам удасца знайсці самі арганізмы, а не толькі іх сляды, гэта прыадчыніць дзверы ў «новы свет».
«Мы пакуль не ведаем, колькі пячорных сістэм сканцэнтравана вакол вулканаў Антарктыды або наколькі гэтыя падледніковыя асяроддзі звязаныя адно з адным. Іх сапраўды складана выявіць, да іх складана дабрацца, іх складана вывучыць», — адзначыў яшчэ адзін даследчык, Чарльз Лі з Універсітэта Вайката.
Па апошніх дадзеных, на тэрыторыі Антарктыды знаходзіцца не менш за 138 падлёдных вулканаў.
Цяпер чытаюць
Польшча адкрывае два пераходы на мяжы з Беларуссю, але пакуль з вялікімі абмежаваннямі19
Каментары