Першае «класіка» без Капскага і разборкі на дне табліцы. Цікавосткі наступнага тура чэмпіянату Беларусі
Разам з Букмекерскай канторай Марафон раскажам, што цікавага можа адбыцца ў дваццаць трэцім туры вышэйшай лігі.
У мінулую суботу не стала Анатоля Капскага. Менеджара, які зрабіў БАТЭ гегемонам у беларускім футболе і пастаянным удзельнікам групавых раўндаў еўракубкаў. Бессэнсоўна адмаўляць уплыў гэтага чалавека і на ўвесь айчынны чэмпіянат увогуле, таму будзем назіраць, як вялікая страта адаб'ецца ў будучыні.
У наступным туры будзе першае беларускае «класіка» без Капскага, а таксама вочныя супрацьстаянні каманд з ніжняй паловы табліцы, якія сур'ёзна могуць усё пераблытаць у барацьбе за выжыванне.
Цяпер пра кожную гульню больш падрабязна.
«Прамень» — «Іслач»
- 28.09 / 19:00. Мінск, САК «Алімпійскі»
- Каэфіцыенты: «Прамень» (перамога) — 2.83, нічыя — 2.94, «Іслач» (перамога) — 2.66
У мінулым туры «Іслач» здолела перарваць дзве серыі: сваю серыю без перамог, якая цягнулася з чэрвеня, а таксама серыю Сяргея Ташуева, пад кіраўніцтвам якога «Шахцёр» яшчэ дагэтуль не прайграваў. А гэта 18 тураў, або 5 месяцаў у часавым эквіваленце.
«Прамень» жа ледзь не выратаваў матч з мінскім «Дынама». Падначаленыя Біёнчыка адгуляліся з ліку 0:2, але не датрымалі і саступілі.
Цяжка прадказаць фаварыта матча. На паперы і ў раскладках букмекераў «Іслач» мае большыя шанцы на перамогу, але ў апошніх турах «Прамень» намацаў сваю гульню і без барацьбы саступаць намераў не мае.
Прагноз «НН»: «Прамень» не саступіць.
«Мінск» — «Дняпро»
- 29.09 / 16:00. Стадыён ФК «Мінск»
- Каэфіцыенты: «Мінск» (перамога) — 2.02, нічыя — 3.15, «Дняпро» (перамога) — 3.90
«Мінск» перамог у «Слуцка» і на сем балаў адарваўся ад зоны вылету. Станоўчы вынік наступнай гульні амаль на сто працэнтаў вырашыць пытанне па захаванні прапіскі ў вышэйшай лізе.
У «Дняпро» ўжо, здаецца, ніхто і не верыць. Ані новы трэнерскі штаб, ані новыя гульцы не паўплывалі на вынікі каманды, а магчымасцяў для выжывання становіцца ўсё менш.
Прагноз «НН»: перамога «Мінска».
«Шахцёр» — «Гарадзея»
- 29.09 / 16:00. Салігорск, стадыён «Будаўнік»
- Каэфіцыенты: «Шахцёр» (перамога) — 1.26, нічыя — 5.10, «Гарадзея» (перамога) — 12.50
«Шахцёр» ужо часткова рэабілітаваўся за бясслаўную паразу ад «Іслачы», выбіўшы ў сераду з Кубка Беларусі брэсцкае «Дынама». У серыі пенальці, але гуляючы большую частку гульні ўдзесяцёх.
Цяпер пытанне, ці хопіць часу аднавіць сілы да гульні з «Гарадзеяй», якая зноў пачала буксаваць — дзве паразы ў апошніх турах.
Прагноз «НН»: перамога «Шахцёра».
«Смалявічы» — «Тарпеда-Мінск»
- 30.09 / 13:00. а/г Кастрычніцкі
- Каэфіцыенты: «Смалявічы» (перамога) — 2.10, нічыя — 3.10, «Тарпеда» (перамога) — 3.70
Амаль усё, што было напісана вышэй у дачыненні да магілёўскага «Дняпра», падыходзіць і да мінскага «Тарпеда». Да ўсіх праблем дадалася і дыскваліфікацыя Барыса Цыганкова за грубы фол у гульні з БАТЭ.
Дысцыплінарнае пакаранне можа чакаць і дырэктара клуба Андрэя Салангіна, які нібыта пагражаў фізічнай расправай арбітру гульні.
Усю эмацыйнасць прадстаўнікоў «Тарпеда» можна спісаць на хваляванні ад турнірных праблем, застаецца пажадаць накіраваць эмацыйны імпульс на поле.
«Смалявічы» амаль вырашылі пытанні па захаванні месца ў вышэйшай лізе, і можна меркаваць, што каманда Бразевіча хутка пераключыцца на рэжым дагульвання.
Прагноз «НН»: перамога «Смалявічаў».
«Дынама-Брэст» — «Слуцк»
- 30.09 / 15:00. АСК «Брэсцкі»
- Каэфіцыенты: «Дынама» (перамога) — 1.64, нічыя — 3.78, «Слуцк» (перамога) — 5.10
Пасля вылету з Кубка важнасць перамогі над «Віцебскам» у апошнім туры павысілася ў разы. Цяпер адзіны шанец «Дынама» пагуляць у наступным годзе ў еўракубках — чацвёртае месца ў вышэйшай лізе пры тым, што Кубак выйграе нехта з топ-3.
«Слуцк» значна ўскладніў сабе жыццё, прайграўшы «Мінску», і ў выпадку чарговай паразы можа аказацца наогул восьмым. Здавалася, што Шыкаўка — незаменны чалавек для каманды, але без флангавых паўабаронцаў Бабко і Кібука «Слуцк» нічога не здолеў паказаць.
Прагноз «НН»: перамога «Дынама».
«Тарпеда-БелАЗ» — «Віцебск»
- 30.09 / 17:00. Жодзіна, стадыён «Тарпеда»
- Каэфіцыенты: «Тарпеда» (перамога) — 2.74, нічыя — 2.94, «Віцебск» (перамога) — 2.74
Шыкоўны аперытыў перад айчынным «класіка».
«Віцебск» не прайграваў цэлы круг (а гэта 15 матчаў, калі забыліся) пасля майскай паразы ў Брэсце. І менавіта брэсцкае «Дынама» спыніла выдатную серыю хлопцаў Ясінскага.
Жодзінскае «Тарпеда» пакуль сёмае, але па страчаных балах займае пяты радок. Каб умоўнасці сталі рэальнасцю — трэба перамагаць і ў «Віцебска». Ёсць і матыў — помста за паразу ў першым коле і вылет з Кубка.
Прагноз «НН»: «Віцебск» не саступіць.
БАТЭ — «Дынама-Мінск»
- 30.09 / 19:45. Барысаў-Арэна
- Каэфіцыенты: БАТЭ (перамога) — 1.56, нічыя — 3.92, «Дынама» (перамога) — 5.75
БАТЭ на класе разабралася з мінскім «Тарпеда», забіўшы тры шыкоўныя мячы. Аляксей Бага адзначыў, што гэта самыя важныя тры балы за ўвесь час ягонай працы ў клубе, а, магчыма, і за ўсю гісторыю БАТЭ.
На чарзе — мінскае «Дынама», якое пасля відавочнага абнаўлення летам чаргуе абсалютна розныя вынікі. Няўдача ў «класіка» на фоне перамог супернікаў можа адкінуць каманду Гурэнкі на чацвёрты радок. Дынамаўцаў чакае хіба не самы важны матч у чэмпіянаце.
Прагноз «НН»: перамога БАТЭ.
«Нёман» — «Гомель»
- 01.10 / 18:30. Гродна. ЦСК «Нёман»
- Каэфіцыенты: «Нёман» (перамога) — 2.10, нічыя — 3.10, «Гомель» (перамога) — 3.70
Шасціматчавая зайздросная серыя «Гомеля» скончылася паразай у Жодзіне. За гэты час «бела-зялёныя» заскочылі з дна табліцы на дзявяты радок. У вышэйшую палову падняцца будзе амаль нерэальна, але пасля няўдалага першага кола выніковае месца ў дзясятцы можна лічыць задавальняючым.
«Нёман» пасля дзвюх перамог пралангіраваў кантракт Ігара Кавалевіча. Паглядзім, ці дадасць гэта ўпэўненасці камандзе.
Прагноз «НН»: тотал, меншы за 2,5.
Калі захочаце схадзіць на футбол, не забудзьцеся сур'ёзна ўцяпліцца! Каб было яшчэ цікавей сачыць за футболам, зрабі стаўку ў Букмекерскай канторы Марафон!
Раптоўна памёр Уладзімір Усер — немалады актывіст, які ўляпаўся ў фільм БТ і шпіянаж у Польшчы29
Каментары