Пасольства ЗША ў Беларусі пракаментавала затрыманне Юрася Зянковіча
Пасольства ЗША ў Беларусі пракаментавала Tut.by затрыманне грамадзяніна ЗША і Беларусі Юрася Зянковіча.
Дыпламаты не сталі адказваць на канкрэтныя пытанні аб тым, як пасольства ацэньвае затрыманне грамадзяніна ЗША беларускімі спецслужбамі і ці наведаў ужо Зянковіча ў СІЗА КДБ консул. У пасольстве толькі падкрэслілі, што заўсёды гатовыя даць консульскія паслугі ў выпадку затрымання амерыканскага грамадзяніна.
— Мы бачылі паведамленні ў СМІ аб змяшчэнні грамадзяніна ЗША пад варту ў Мінску. У кожным выпадку арышту або затрымання грамадзяніна ЗША за мяжой мы гатовыя даць усе неабходныя консульскія паслугі. Адной з найважнейшых задач Дзяржаўнага дэпартамента, пасольстваў і консульстваў ЗША з'яўляецца аказанне дапамогі грамадзянам ЗША, якія знаходзяцца ў зняволенні або затрыманыя за мяжой. Згодна з існай практыкай мы не перадаём інфармацыю аб грамадзянах ЗША без іх пісьмовай згоды, — сказаў Tut.by прэс-аташэ пасольства ЗША ў Беларусі Цім О'Конар.
Пра затрыманне юрыста Юрася Зянковіча ў Маскве стала вядома 13 красавіка. Па словах яго жонкі, яго літаральна выкралі з расійскага гатэля. У гэты ж дзень у КДБ паведамілі пра затрыманне Рыгора Кастусёва і Аляксандра Фядуты па «непасрэдна ўзніклым падазрэнні ў здзяйсненні злачынства». Аляксандр Фядута, як і Зянковіч, быў затрыманы ў Маскве.
У адваката Юрася Зянковіча два грамадзянствы — беларускае і амерыканскае. На радзіме Зянковіч быў актывістам апазіцыі, сябрам Партыі БНФ. У ЗША з'ехаў у сярэдзіне 2000-х, там пачаў будаваць юрыдычную кар'еру.
Жонка юрыста Алена Дзенісавец паведаміла СМІ, што, па інфармацыі адваката, Зянковіч знаходзіцца ў статусе падазраванага, але канкрэтнага артыкула ён не назваў.
«Сказаў, што дэталяў паведаміць не можа. Але ў Маскве, калі яго затрымлівалі, сказалі супрацоўнікам, што ён падазраецца ў тэрарызме», — распавяла Дзенісавец.
Цяпер чытаюць
Чэргаў на мяжы цяпер не будзе? Чаго чакаць ад адкрыцця «Брузгоў» і «Бераставіцы»4
Каментары