Па справе аб «масавых беспарадках» у Брэсце судзяць яшчэ 12 чалавек, з іх трое непаўналетніх
11 чэрвеня ў Ленінскім раённым судзе Брэста пачаўся суд над чацвёртай часткай фігурантаў, якіх вінавацяць ва ўдзеле ў масавых беспарадках (ч. 2 арт. 293 Крымінальнага кодэкса).
Сёння раніцай прайшло першае пасяджэнне, наступнае прызначанае на 16 чэрвеня.
Берасцейцам пагражае ад 3 да 8 гадоў пазбаўлення волі. Справу разглядае cуддзя Ленінскага раёна Дзмітрый Шурын, піша Радыё Свабода.
На лаве падсудных 12 чалавек:
- Марк Антонаў
- Святаслаў Герасімук (17 красавіка ўзяў шлюб у СІЗА)
- Давід Збаранскі (сустрэў 18-годдзе ў СІЗА)
- Максім Імховік (непаўналетні)
- Валеры Мельнічук
- Іван Пацейчук (непаўналетні)
- Яўген Пекач
- Марэк Сірадзэ
- Андрэй Тарасавец
- Вячаслаў Трафімук
- Аляксандр Цімафееў
- Алег Юраў (непаўналетні)
Дзяржабвінаваўца сцвярджае, што падсудныя 10 жніўня падчас несанкцыянаванага масавага мерапрыемства ў цэнтры Брэста — на вуліцах Савецкай і Нафтавай, бульварах Шаўчэнкі і Касманаўтаў, праспекце Машэрава — груба парушылі грамадскі парадак і нібыта ўчынілі пагромы.
У выніку беспарадкаў, па версіі следства, пацярпелі больш за 20 сілавікоў. Агульную суму нанесенай шкоды следства ацаніла ў 24 тысячы рублёў (пашкоджана 13 аўтамабіляў міліцыі, адзін аўтобус, шчыты, шлемы, бронекамізэлькі, асфальт, тратуарная плітка, лаўкі, сметніцы, дрэвы).
***
У справе аб «масавых беспарадках» у Брэсце на гэты момант агулам асудзілі ўжо 22 чалавекі. Так, 10 сакавіка суддзя Вера Філонік асудзіла дзевяць чалавек на тэрміны ад 3 да 4,5 года калоніі. Непаўналетнія Сяргей Гацкевіч і Дзяніс Хазей атрымалі 3 гады выхаваўчай калоніі.
21 мая Андрэй Грушко прысудзіў яшчэ 13 фігурантам ад 3 гадоў выхаваўчай калоніі да 5 гадоў. Сярод абвінавачаных была і дзяўчына асуджанага Дзяніса Хазея 18-гадовая Віталія Бандарэнка. Яе пакаралі 4 гадамі калоніі агульнага рэжыму.
Суд над трэцяй часткай абвінавачаных працягваецца з 28 мая па сённяшні дзень. У справе праходзяць 13 фігурантаў.
Цяпер чытаюць
Польшча адкрывае два пераходы на мяжы з Беларуссю, але пакуль з вялікімі абмежаваннямі15
Каментары