Прэзідэнт Францыі Эмануэль Макрон заявіў пра магчымае прызнанне палесцінскай дзяржавы ў найбліжэйшыя месяцы, паведамляе Euronews. «Мы павінны рухацца да прызнання і, магчыма, дзесьці ў чэрвені мы будзем гатовыя завяршыць гэты працэс», — сказаў ён.
Прэзідэнт Францыі Эмануэль Макрон заявіў, што ягоная краіна плануе прызнаць Палесціну ў якасці дзяржавы ў чэрвені гэтага года. Ён зрабіў гэта ў інтэрв'ю французскаму тэлеканалу France 5 падчас двухдзённай паездкі ў Егіпет.
«Наша мэта — дзесьці ў чэрвені ўзначаліць канферэнцыю з Саудаўскай Аравіяй, дзе мы маглі б завяршыць працэс узаемным прызнаннем з боку некалькіх дзяржаў», — сказаў Макрон.
«Я раблю гэта… таму што думаю, што ў нейкі момант гэта будзе правільна, і таму што я таксама хачу ўдзельнічаць у калектыўнай дынаміцы, якая таксама павінна дазволіць усім, хто абараняе Палесціну, у сваю чаргу, прызнаць Ізраіль, чаго многія з іх не робяць», — працягнуў прэзідэнт Францыі.
Эмануэль Макрон дадаў, што гэта дазволіць Францыі «выразна змагацца з тымі, хто адмаўляе права Ізраіля на існаванне», у прыватнасці з Іранам, а таксама пацвердзіць прыхільнасць «калектыўнай бяспекі ў рэгіёне».
У чэрвені Францыя разам з Саудаўскай Аравіяй будзе старшынстваваць на двухдзённай канферэнцыі ААН у Нью-Ёрку, мэтай якой з'яўляецца падтрымка рашэння аб дзвюх дзяржавах пасля 18-месячнай вайны ў Газе паміж Ізраілем і палесцінскім рухам ХАМАС.
Аднак афіцыйнае прызнанне Парыжам палесцінскай дзяржавы азначала б значны зрух у палітыцы і магло б прывесці да абвастрэння адносін з Ізраілем.
Цяпер амаль 150 краін прызнаюць Палесціну ў якасці дзяржавы, апошнімі гэта зрабілі Ірландыя, Нарвегія і Іспанія ў траўні 2024 года. У ліку тых, хто не прызнае палесцінскую дзяржаву — ЗША, Канада і многія краіны Заходняй Еўропы.
Прэм'ер-міністр Ізраіля Біньямін Нетаньяху па-ранейшаму адхіляе рашэнне аб дзвюх дзяржавах, сцвярджаючы, што наданне дзяржаўнасці стане «велізарнай узнагародай» пасля нападу на Ізраіль, здзейсненага 7 кастрычніка 2023 года пад кіраўніцтвам ХАМАС.
Каментары