Твітар пачаў паказваць краіны паходжання акаўнтаў. Расказваем, ці гэта небяспечна і як схаваць сваю краіну
У твітары сталі паказваць, з якой лакацыі, меркавана, вядуцца тыя ці іншыя акаўнты. Гэта стала дрэннай навіной для актывістаў з аўтарытарных краін, якія стараюцца не свяціць сваё рэальнае месцазнаходжанне. Але насамрэч даволі лёгка амаль схаваць, адкуль ты вядзеш акаўнт — тлумачым як.
Як працуе гэтая функцыя і ці яна небяспечная?
21 лістапада на платформе X з'явілася новая функцыя — калі націснуць на дату далучэння да платформы, то ў меню будзе відаць не толькі агульная інфармацыя, але і краіна паходжання акаўнта, і кліент, праз які карыстальнік яго вядзе. Выглядае гэта так:
Першы і найбольшы скандал пасля ўзнік з акаўнтамі, якія падтрымлівалі Дональда Трампа. Напрыклад, высветлілася, што адзін з буйных каналаў MAGA-тэматыкі (больш за 400 тысяч падпісчыкаў) вядуць з Усходняй Еўропы, фан-акаўнт дачкі Трампа Ivanka News з мільёнам падпісантаў — з Нігерыі, а адзін з каналаў Trump Fan Army (500+ тысяч) — з Індыі.
Актывісты з аўтарытарных краін выказалі занепакоенасць, некаторыя нават называюць гэта прымусовым раскрыццём даных і перажываюць за сваю бяспеку. Некаторыя людзі таксама мяркуюць, што твітар будзе раскрываць даныя іхніх падарожжаў і засвеціць перамяшчэнні. Адміністрацыя платформы кажа, што падставаў для трывогі няма — маўляў, усе рызыкі ўлічаныя.
Яшчэ адна праблема ў тым, што калі ты выкарыстоўваеш VPN, то лакацыя будзе недакладнай. Праўда, твітар усё роўна будзе паказваць, з маркета якой краіны вы спампавалі праграму. І гэта дадатковая рызыка раскрыцця вашага рэальнага месцазнаходжання.
Напрыклад, так выглядае канал папулярнай расійскай блогеркі «полин, переведи?» (@vs_polia). Яна сядзіць праз ВПН, таму яе акаўнт «базуецца» ў Нідэрландах. Але бачна, што яна сядзіць праз кліент з расійскага App Store, праз што нескладана вылічыць, што яна з Расіі.
Насамрэч, да канца незразумела, ці дапаможа гэта пазбягаць распаўсюду дэзынфармацыі. Большая частка такіх акаўнтаў не блакуецца. А папулярнасці яны часцяком дасягаюць колькасцю каментароў, а не якасцю. Прынамсі пра нейкія магчымыя меры супраць такіх акаўнтаў не паведамлялася.
Як схаваць краіну паходжання акаўнта ў твітары?
Але ёсць налада, якая дазваляе зрабіць ваша месцазнаходжанне больш абстрактным. Каб яе ўключыць, трэба ўвайсці ў настройкі праз браўзер на камп'ютары або смартфоне ці абноўленую праграму для смартфонаў.
Там выберыце пункт Privacy and safety. Адкрыецца гэты пункт меню.
Там націсніце пункт About your account. Адкрыецца новае меню.
Далей варта выбраць Use Region/Continent. Пасля гэтага звесткі пра лакалізацыю будуць больш агульнымі. Вось, напрыклад, як выглядае акаўнт, які вядзецца з Польшчы, пасля ўключэння налады:
«Наша Нiва» — бастыён беларушчыны
ПАДТРЫМАЦЬ
Каментары
На сумленне сучасных тэхнафеадалаў няма сэнсу спадзявацца. Прыватнасць - гэта адно з сучасных праў чалавека, а прыхільнікі скрэпна-лапідарных каштоўнасцей лічаць усе правы ліберальнай бздурай.