Памятаеце немаладога актывіста, які па дурасці зняўся ў прапагандысцкім кіно БТ? У Польшчы ён уляпаўся яшчэ і ў шпіянаж

Сусед Уладзіміра Усера, з якім яны дзялілі арэндную кватэру, расказаў «Нашай Ніве» дэталі затрымання актывіста.

Паводле звестак польскай пракуратуры, трое беларусаў і двое ўкраінцаў з сакавіка 2024 года да лютага 2025‑га супрацоўнічалі з замежнай разведкай і выконвалі розныя заданні, якія атрымлівалі з паведамленняў у тэлеграме. У іх задачы ўваходзіла фатаграфаванне аб'ектаў крытычнай інфраструктуры і месцаў, важных для бяспекі дзяржавы. Акрамя таго, яны павінны былі развешваць плакаты і маляваць графіці.

«Два дні таму я сядзеў за кампом, была недзе палова на дзясятую раніцы, як пачуўся грукат у дзверы — за імі былі, як я зразумеў, двое супрацоўнікаў Агенцтва ўнутранай бяспекі. Яны і яшчэ недзе восем чалавек са зброяй і ў бронекамізэльках забеглі ў кватэру — спачатку мяне схапілі, спыталі, ці ёсць у мяне зброя, наркотыкі. І адразу пацікавіліся, дзе Уладзімір Усер. Сусед зусім не разумее па-польску, таму спачатку я яму нешта перакладаў, а потым яму перакладчыка далі, і той ужо зачытваў абвінавачванне».

Павялічыць

Па словах суразмоўцы, у іх кватэры правялі ператрус — уважліва праглядзелі ў тым ліку яго тэхніку. Тэлефон і камп’ютар Усера-Лазарава забралі разам з ім.

«Як я зразумеў, яго павезлі да Варшавы, а цяпер ён у шпіталі. У яго са здароўем бяда — цукровы дыябет, ногі распухлыя, лімфа цякла з ног, а яшчэ ў яго нешта з дыханнем».

У сувязі з такім станам здароўя ў дачыненні да Усера суд на гэты момант абраў меру стрымання, не звязаную з пазбаўленнем волі. Аднак яму забаронена пакідаць Польшчу.

Сусед Уладзіміра прызнаўся, што мужчына жыў у антысанітарных нормах: пакой не прыбіраў, амаль ніколі не мыўся. А калі прымушалі — проста абліваўся вадой і нацягваў на сябе такое ж бруднае адзенне.

Апошнім часам, працягвае суразмоўца, Уладзімір пастаянна слухаў рускае радыё.

«Я сварыўся, спрабаваў яму паказваць «Радыё Свабоду», «Радыё Рацыя», але не дапамагала. У нейкі момант я проста яму адрубаў інтэрнэт, але ён прасіў вярнуць назад. Асабліва злым я зрабіўся пасля таго, як ён зняў за ганарар кадры пра цяжкасці эміграцыі для прапагандыстаў з БТ».

Сусед расказвае што былы актывіст цэлымі днямі нічым не займаўся, акрамя таго, што сядзеў у інтэрнэце, паліў і спаў.

«Не ведаю, на якія грошы ён жыў. Часам казаў, што яму сябра з Амерыкі дапамагае. Ну, і яму дапамагалі беларусы, але тое ж былі разавыя выплаты. Пенсію ж ён даўно не мог атрымліваць, бо скончылася картка. Я яму ўвесь час казаў узяцца за галаву, бо ў яго ж нічога не было за душой, а ён мне ў адказ: «Грошы — не праблема».

Цяпер сусед асэнсоўвае, што сродкі на існаванне Уладзіміру маглі паступаць за супрацоўніцтва з разведкай.

«Але жыў ён бедна. Як яго забралі, паглядзеў, што з ежы ў яго была нейкае проса, слоік з гарошкам, хлеб, алей на дне, крыху цукру, солі — і ўсё. Ён харчаваўся за кошт суседзяў. Мог у мяне малака адліць ці яшчэ што.

Пры гэтым дачка ж у яго ў Ізраілі даўно, і пасля яго эміграцыі дапамогу прапаноўвала. Але ён працаваць не хацеў, хацеў на шыі сядзець, таму, як я ведаю, сям’я ад яго адмовілася. Думаю, у яго агулам нешта з галавой, бо калі ён не зрабіў высновы пасля той гісторыі з БТ, а яшчэ далей залез, то што тут скажаш яшчэ».

Акрамя Уладзіміра Усера, сярод затрыманых 25 і 26 лістапада аказаліся грамадзяне Беларусі Вікторыя M. і Антон M., а таксама двое ўкраінцаў. Іх ужо дапыталі і выставілі абвінавачванні. Па інкрымінаваных артыкулах ім можа пагражаць ад 5 да 30 гадоў пазбаўлення волі.

• 0
• 0
• 0
• 10
• 0
• 1
• 1
• 0