Сабралася 15 чалавек, затрыманняў не было.
У Магілёве прайшла чарговая акцыя маўклівага пратэсту, удзел у якой узялі пятнаццаць чалавек.
Зорная плошча і сквер каля крамы "Лявоніха" ў 19.00 патрулявалі ўзмоцненыя нарады міліцыі. Удзельнікі акцыі, у асноўным моладзь, сабраліся каля сквера. Пастаяўшы там да 19.30, некаторыя рушылі па бульвары Леніна да вуліцы Ленінскай. Маладыя людзі ішлі ціха, за імі ішлі супрацоўнікі міліцыі і журналісты.
На Зорнай плошчы каля кінатэатра "Радзіма" некаторыя ўдзельнікі акцыі пачалі фатаграфаваць супрацоўнікаў міліцыі, а таксама аператараў у цывільным, што ішлі за імі. Нягледзячы на незадаволенасць аднаго з міліцыянтаў тым, што яго фатаграфуюць, удзельнікі акцыі працягвалі фотаздымку, запатрабаваўшы, у сваю чаргу, спыніць здымаць іх на відэакамеру.
Дайшоўшы да корпуса Магілёўскага дзяржаўнага універсітэта імя Куляшова на вуліцы Ленінскай, удзельнікі маўклівай акцыі далучыліся да людзей, якія слухалі хлопца, які спяваў пад гітару. Па просьбе ўдзельнікаў акцыі ён праспяваў некалькі песень з рэпертуару групы "Ляпіс Трубяцкой".
Пасля гэтага ўдзельнікі акцыі разышліся. Затрыманняў не было.
Каментары