«Kraina Biełaruś» vyjšła pa-anhlijsku i pa-rasiejsku
Heta — pieršaje anhłamoŭnaje vydańnie takoha kštałtu, pryśviečanaje historyi Biełarusi i stvoranaje biełaruskimi aŭtarami.
U słavackim vydaviectvie Kalligram (Bracisłava) vyjšaŭ u śviet anhlijski pierakład papularnaj knihi Uładzimira Arłova i Źmitra Hierasimoviča «Kraina Biełaruś» — «This country called Belarus. An illustrated history».
Aŭtar pierakładu i ŭstupnaha słova da anhlijskamoŭnych čytačoŭ — brytanski biełarusist prafiesar Džym Dynhli. Ideja hetaha vydańnia źjaviłasia daŭno, ale nabyła realnyja abrysy, kali joju natchniłasia hramadckaja dziajačka Volha Stužynskaja.
Kniha ŭvodzić u śviet našaj minuŭščyny ad staražytnych časoŭ da pačatku XX stahodździa. Historyja Biełarusi razhladajecca jak častka ahulnajeŭrapiejskaha raźvićcia cyvilizacyi. Tekst supravadžajuć kala dźviuch tysiač ilustracyj, u tym liku ŭnikalnyja letapisnyja minijaciury, siaredniaviečnyja hraviury, redkija fotazdymki. Kniha pierakanaŭča śćviardžaje, što biełarusy histaryčna, kulturna i mientalna naležać da Jeŭropy.
Heta — pieršaje anhlijskamoŭnaje vydańnie takoha kštałtu, pryśviečanaje historyi Biełarusi i stvoranaje biełaruskimi aŭtarami.
Prezientacyi knihi, aprača Minska, płanujecca pravieści ŭ niekalkich jeŭrapiejskich stalicach.
Adnačasova toje samaje słavackaje vydaviectva vypuściła ruskamoŭny pierakład «Krainy Biełarusi».
Hetymi dniami abodva vydańni pastupiać u «Akademknihu» dy inšyja kniharni.
Knihavydaŭcy miarkujuć, što pierakłady knihi «Kraina Biełaruś» nie tolki zacikaviać zamiežnych vučonych i dypłamataŭ, pradprymalnikaŭ i turystaŭ, ale i značna pavialičać kolkaść siabroŭ našaj krainy.