Rusłan Słucki, asudžany na 11 hadoŭ, i jašče šeść čałaviek pryznanyja palitviaźniami
Pravaabaroncy pryznali palitviaziami čarhovuju hrupu viaźniaŭ. Usiaho ich siamiora, usie ŭžo asudžanyja na roznyja terminy pazbaŭleńnia voli. Bolš za ŭsich — 11 hadoŭ kałonii — atrymaŭ Rusłan Słucki. Usiaho ŭ Biełarusi ciapier 995 palitviaźniaŭ
Palityčnymi viaźniami pryznanyja:
Hienadź Siaŭruk — asudžany pavodle art. 364 KK za pahrozu ŭžyvańnia hvałtu ŭ dačynieńni da supracoŭnika orhanaŭ unutranych spraŭ u kamientaryjach u sacyjalnych sietkach, art. 369 KK za abrazu pradstaŭnika ŭłady, art. 368 KK za abrazu Łukašenki, art. 130 KK za raspalvańnie sacyjalnaj varožaści. Prysud — 4 hady pazbaŭleńnia voli ŭ papraŭčaj kałonii;
Juryj Čudzinovič — asudžany pavodle art. 130 KK za raspalvańnie ŭ sietcy internet sacyjalnaj varožaści, art. 188 KK za paklop na sacyjalnaha piedahoha — člena vybarčaj kamisii, art. 174 za ŭchileńnie ad vypłaty alimientaŭ. Prysud — 4 hady pazbaŭleńnia voli ŭ papraŭčaj kałonii;
Dźmitryj Kanieŭski — asudžany pavodle art. 130 KK za raspalvańnie ŭ kamientaryjach sacyjalnaj varožaści ŭ dačynieńni da supracoŭnikaŭ milicyi. Prysud — 3 hady pazbaŭleńnia voli ŭ papraŭčaj kałonii;
Andrej Sačanka — asudžany pavodle art. 364 KK za pahrozu prymianieńnia hvałtu ŭ dačynieńni da supracoŭnika orhanaŭ unutranych spraŭ u sietcy internet, art. 366 KK za pahrozu ŭ dačynieńni da słužbovaj asoby, jakaja vykonvaje słužbovyja abaviazki, ci inšaj asoby, jakaja vykonvaje hramadski abaviazak. Prysud — 3 hady pazbaŭleńnia voli ŭ papraŭčaj kałonii;
Alaksandr Ivanoŭ — asudžany pavodle art. 364 KK za telefonnyja pahrozy prymianieńnia hvałtu ŭ dačynieńni da supracoŭnikaŭ orhanaŭ unutranych spraŭ i art. 391 KK za abrazu sudździ. Prysud — try hady pazbaŭleńnia voli ŭ papraŭčaj kałonii;
Uładzisłaŭ Cimaščuk — asudžany pavodle art. 130 KK za vykazvańni ŭ sacyjalnych sietkach, jakija raspalvajuć sacyjalnuju varožaść u dačynieńni da supracoŭnikaŭ MUS. Prysud — 3 hady pazbaŭleńnia voli ŭ papraŭčaj kałonii;
Rusłan Słucki — asudžany pavodle č. 1 art. 14, č. 1 art. 309 KK za zamach na pryviadzieńnie ŭ nieprydatnaść čyhunačnych šlachoŭ znosin — sprobu złučyć mietaličnym drotam rejki, što mahło pryvieści da zatrymki ruchu ciahnikoŭ, a taksama pa č. 1 art. 289 KK za «akt teraryzmu» — padkidvańnie na aŭtamabilnuju darohu samarobnych mietaličnych šypoŭ pierad aŭtamabilami, jakija ŭdzielničali ŭ praŭładnym aŭtaprabiehu, u vyniku jakoha byli paškodžanyja šyny čatyroch aŭtamabilaŭ. Prysud — 11 hadoŭ pazbaŭleńnia voli.