Što viadoma pra biełarusa Andreja Sakałoŭskaha-Stankieviča, jakoha aryštavali ŭ Rasii i abvinavačvajuć u padrychtoŭcy dyviersii
Žychar Rečycy paciarpieŭ padčas vypadkovaha vybuchu ŭ kvatery ŭ Chanty-Mansijsku. Rasijskija miedyja ŭžo achryścili jaho «ŭkrainskim ahientam».
Andrej Sakałoŭski-Stankievič. Fota ź jahonaj staronki Ukantakcie
Biełarusa Andreja Sakałoŭskaha-Stankieviča i jaho znajomaha ŭkrainca Andreja Kijašku zatrymali ŭ Rasii 12 krasavika. Pavodle viersii śledstva, jany źbirali bombu na Pramysłovaj vulicy ŭ horadzie Chanty-Mansijsku dla ździajśnieńnia dyviersii na zamovu ŭkrainskich śpiecsłužbaŭ. U vyniku niaŭdačy adbyŭsia vybuch, jaki źniščyŭ niekalki kvater, piać čałaviek paciarpieli, uklučajučy zborščykaŭ bomby.
Kijaška i Sakałoŭski-Stankievič aryštavanyja, razam ź imi pa spravie prachodzić hramadzianin Małdovy, jaki pryvioz u Rasiju kampanienty vybuchoŭki.
Andreju Sakałoŭskamu-Stankieviču 48 hadoŭ. Rodam jon z Homiela, ale žyŭ u Rečycy. Skončyŭ Homielski dziaržaŭny ŭniviersitet pa śpiecyjalnaści «Hieałohija i raźviedka radoviščaŭ karystych vykapniaŭ».
Pa źviestkach Digital Intelligence Team, u jaho dvoje synoŭ, adzin ź jakich paŭnaletni. Taksama jon niadaŭna pabraŭsia novym šlubam.
U Biełarusi Andrej pracavaŭ staršym majstram na «Biełarusnafcie», ale jeździŭ pracavać i ŭ Rasii. Apošni raz jon mieŭ aficyjnuju pracu ŭ Biełarusi nie paźniej za 2019 hod. A paśla vyjechaŭ na pastajannaje miesca žycharstva ŭ rasijski Nižnievartaŭsk i atrymaŭ tam hramadzianstva Rasii. Pracuje ŭ naftavaj śfiery.
Nižnievartaŭsk — horad u Chanty-Mansijskaj aŭtanomnaj akruzie Rasii za tysiačy kiłamietraŭ ad jaho rodnaha Homiela.
Sakałoŭski-Stankievič. Fota ź jahonaj staronki Ukantakcie
Čytajcie taksama:
Stała viadoma asoba biełarusa, jakoha padazravajuć u vybuchu ŭ Chanty-Mansijsku
U Rasii za padrychtoŭku dyviersii suprać rasijskaha vajskoŭca zatrymany biełarus