Rachunki «Biełnaftachimu» zamarožanyja ŭ Łatvii i Estonii

Siońnia stała viadoma, u jakich bankach u Łatvii i Estonii zamarožanyja rachunki biełaruskaha dziaržaŭnaha kancernu «Biełnaftachim». Heta — lakalnyja padraździaleńni švedzkaj finansavaj hrupy «Hansabanka» ŭ Ryzie i «Hansapank» u Talinie. Ichnija dziejańni stali praciaham rašeńnia administracyi prezydenta ZŠA zamarozić rachunki «Biełnaftachima».

Pastanovaj Rady estonskaha «Hansapank» zamarožanyja rachunki pradpryjemstva «Belneftehim Baltic OU», — paviedamlaje siońnia estonskaja hazeta «Dziełavyja viedamaści». Faktyčna finansavaja struktura vykazała padtrymku administracyi prezydenta ZŠA, jakaja zapatrabavała zamarozić usie hrašovyja srodki i ekanamičnyja resursy, jakija znachodziacca va ŭłasnaści, va ŭładańni abo pad kantrolem prezydenta Biełarusi.

Analahičny krok zrabiŭ i łatyski «Hansabanka». Praŭda, na niejki čas rachunki byli znoŭ razblakavanyja. Łatyskija medyi cytujuć kiraŭnika praŭleńnia «Belneftehim Baltic SIA» Uładzimiera Dziamidava, jaki patłumačyŭ, što heta zroblena dziela taho, «kab dać mahčymaść razabracca ŭ sytuacyi».

U «Biełnaftachimie» admovilisia kamentavać padobnyja zachady, a pamočnik staršyni kancernu Viktar Azaraŭ skazaŭ, što nia maje nakont hetaha dakładnaj infarmacyi: «Nia viedaju nijakich akaličnaściaŭ, tamu kamentavać nie biarusia…»

Pakazalna, što zhadanyja krainy hatovyja nieści straty ad zachadaŭ, nakiravanych suprać «Biełnaftachimu». Prykładam, letaś praz Łatviju tranzytam prajšło 11,6 miljona ton hruzaŭ z «Biełnaftachimu»: 8,6 miljona ton naftapraduktaŭ i 3 miljony ton kalijnych uhnajeńniaŭ. Kali sychodzić z raźliku (pryblizna takuju ličbu nazyvajuć U «Biełnaftachim Bałtyk» pamier płaty za pasłuhi čyhunki, terminałaŭ, partoŭ i h.d. aceńvajuć pryblizna ŭ 15 dalaraŭ za tonu. Kali sychodzić z takoha raźliku, to letaś Łatvija zarabiła 174 miljony dalaraŭ. Adnak paśla dałučeńnia da sankcyjaŭ, uviedzienych Złučanymi Štatami, daviadziecca źmirycca sa strataj hetych prybytkaŭ.

Ivars Ivan, kiraŭnik upraŭleńnia «Hansabanka», kaža, što nia ŭsio vymiarajecca finansavymi stratami:

«U adno słova ciažka ŭkłaści ŭsio, kab kamentavać takija dalikatnyja rečy. Treba viedać usiu ŭnutranuju kuchniu, kab pryvieści dakładnyja arhumenty «za» ci «suprać» takoha rašeńnia».

Zacikaŭlenaść «Biełnaftachimu» u krainach Bałtyi značnaja

Tak, u Łatviju kancern ekspartavaŭ letaś pradukcyi na sumu kala 138 miljonaŭ dalaraŭ. Za pieršuju pałovu 2007 hodu — užo na 219 miljonaŭ dalaraŭ. Praz party Litvy, Łatvii i Estonii prachodzić kala 80% usiaho ekspartnaha abjomu naftapraduktaŭ kancernu. Usiaho ž u minułym hodzie abjomy pieravałki naftapraduktaŭ skłali: praz Łatviju — 71,2 %; Estoniju — 18,6 %; Litvu — 10,2 %.

Nahadajem, što 13 listapada administracyja Džordža Buša zamaroziła rachunki dziaržaŭnaha kancernu «Biełnaftachim». Uviedzienyja Ministerstvam finansaŭ ZŠA sankcyi tyčacca ŭsich pradstaŭnictvaŭ «Biełnaftachimu» ŭ Niamieččynie, Ukrainie, Rasiei, krainach Bałtyi i Kitai, a taksama amerykanskaha daččynaha padraździaleńnia kancernu «Belneftekhim USA». Z usimi hetymi arhanizacyjami hramadzianam Złučanych Štataŭ zabaroniena zaklučać ździełki i vieści finansavyja spravy.

Sankcyi suprać Biełarusi z boku ZŠA i inšych krainaŭ, jakija da ich dałučylisia, buduć dziejničać da taho času, pakul aficyjny Miensk nia vyjavić hatovaści zachoŭvać demakratyčnyja normy.

«Biełnaftachim» naličvaje 80 arhanizacyj i 130 tysiač pracoŭnych, jakija zaniatyja ŭ sfery naftapierapracoŭki. Pradukcyja kancerna ekspartujecca bolš jak u 80 krainaŭ śvietu. Źniešniehandlovy abarot «Biełnaftachimu» składaje 7,5 miljardaŭ dalaraŭ na hod. U struktury ekspartu kancernu 56 % zajmajuć naftapradukty, 16 % — kalijnyja ŭhnajeńni, 6,6 % — šyny vytvorčaha abjadnańnia «Biełšyna». Inšaja naftachimičnaja pradukcyja ŭ struktury ekspartu zajmaje kala 22 %.

• 0
• 0
• 0
• 0
• 0
• 0
• 0
• 0