Hramadska-palityčnaja situacyja ŭ Biełarusi stała adnoj z asnoŭnych tem na sustrečy jeŭrakamisara ES pa pytańniach pašyreńnia i palitycy dobrasusiedstva Jochaniesa Chana z pradstaŭnikami demakratyčnych sił, jakaja adbyłasia 16 krasavika ŭ Minsku.
U sustrečy ŭdzielničali lidary Biełaruskaj sacyjał-demakratyčnaj partyi (Hramada) Iryna Vieštard, ruchu «Za Svabodu» Alaksandr Milinkievič, Abjadnanaj hramadzianskaj partyi Anatol Labiedźka, Partyi BNF Alaksiej Janukievič, pradstaŭnik arhkamiteta pa stvareńni partyi «Biełaruskaja chryścijanskaja demakratyja» Volha Kavalkova i palityk Uładzimir Niaklajeŭ.
Na sustrečy było ahavorana, što jaje ŭdzielniki nie stanuć cytavać kankretnyja zajavy adzin adnaho.
«Była adkrytaja i ščyraja razmova. Jochanies Chan nie tolki aryjentujecca ŭ faktach, jakija tyčacca Biełarusi, ale i razumieje pahrozy i vykliki, što stajać pierad biełaruskim hramadstvam i dziaržavaj. Heta pazityŭny znak», — zajaviŭ BiełaPAN Janukievič.
Pavodle jaho słoŭ, uzdymalisia pytańni pahrozy niezaležnaści Biełarusi, situacyi ŭ rehijonie, prablema palitźniavolenych, pytańni dyjałohu pamiž uładami Biełarusi i ES, a taksama prahavorvalisia mahčymyja scenaryi raźvićcia padziej na prezidenckich vybarach hetaha hoda.
«Dumaju, vizit jeŭrakamisara źviazany nie tolki z aznajamleńniem ź situacyjaj u Biełarusi. Vierahodna, pa vynikach vizitu buduć zrobleny i rekamiendacyi, što rabić ź Biełaruśsiu ŭ miežach prahramy ES «Uschodniaje partniorstva», — zajaviŭ BiełaPAN Labiedźka.
«Ciapier idzie acenka efiektyŭnaści Uschodniaha partniorstva, abmiarkoŭvajecca, jakoj budzie dalej stratehija raźvićcia hetaha prajekta. Chutčej za ŭsio, treba čakać, što budzie roznachutkasnaja intehracyja ŭ miežach UP, i my tam nie lidary, a aŭtsajdary», — padkreśliŭ jon.
Labiedźka adznačyŭ, što na sustrečy rabiŭ akcent na «ryzykach i pahrozach zvonku, u pryvatnaści, pucinizacyi z Uschodu i azierbajdžanizacyi z Zachadu».
«Pucinizacyja — heta raspaŭsiudžvańnie scenaryja na ŭschodzie Ukrainy na Biełaruś, ab hetym treba havaryć, niachaj pakul heta i zdajecca małavierahodnym. Azierbajdžanizacyja moža adbycca, kali zachad zrobić pamyłku i pojdzie na pryznańnie lehitymnaści vynikaŭ prezidenckaj kampanii. Heta tupikovy šlach», — patłumačyŭ jon.
Niaklajeŭ u kamientary dla BiełaPAN paviedamiŭ, što płanavaŭ admovicca ad udziełu ŭ sustrečy ź jeŭrakamisaram, bo bolš nie pradstaŭlaje nijakija apazicyjnyja struktury. «Na heta było skazana, što ab maim vychadzie z apazicyi ŭ pradstaŭnictvie ES viedajuć, i dla ich dastatkova, kali ja budu pradstaŭlać na sustrečy Uładzimira Niaklajeva — hramadzianina Respubliki Biełaruś. Tak što sustreča vyjšła trochbakovaja: pradstaŭnik ES jeŭrakamisar Jochanies Chan, pradstaŭniki biełaruskaj apazicyi i pradstaŭnik hramadzianskaj supolnaści Uładzimir Niaklajeŭ», — skazaŭ jon.
Pavodle słoŭ Niaklajeva, «hramadzianskaja supolnaść na sustrečy ŭ takim farmacie pradstaŭlena paśla 2010 hoda ŭpieršyniu».
«Ja liču, što heta vielmi svoječasovy i pravilny krok z boku Jeŭrasajuza. Udzielnikami takich pieramoŭ nie mohuć być tolki ŭłada i apazicyja, intaresy jakich, asabliva intaresy ŭłady, daloka nie va ŭsim supadajuć ź intaresami hramadstva — i navat supiarečać im. Skažam, imknieńnie Łukašenki lubymi sposabami zachavacca va ŭładzie zusim nie źjaŭlajecca hałoŭnym intaresam hramadstva. Hałoŭny intares hramadstva — raźvićcio, jakoje b zabiaśpiečyła dabrabyt naroda, kožnaha hramadzianina», — skazaŭ jon.
Niaklajeŭ adznačyŭ, što na sustrečy havaryŭ ab tym, što padtrymlivaje palityku ES, nakiravanuju na dyjałoh ź Biełaruśsiu. «Ale nielha vieści dyjałoh tak, kab vyhady ź jaho mieła tolki ŭłada. Kab hramadstvu heta ničoha nie davała, akramia dekretaŭ, pa jakich ułada, vyciskajučy z naroda apošnija soki, abkładaje padatkami navat tych, kaho sama, zvalniajučy ludziej, skaračajučy pracoŭnyja miescy, zrabiła biespracoŭnymi — i nazvała «darmajedami». I kab navat palitźniavolenyja pa vynikach hetaha dyjałohu nie mieli nadziei na volu. Dyk ab čym tady dyjałoh? Ab palitycy sadziejańnia? Čamu i kamu? A što da majho prava pradstaŭlać na palityčnym uzroŭni biełaruskaje hramadstva, dyk sotni tysiač hramadzian Biełarusi, jakija padtrymali mianie na papiarednich prezidenckich vybarach i padtrymlivajuć ciapier, dajuć mnie takoje prava», — skazaŭ jon.
Hałoŭnaj metaj vizitu Jochaniesa Chana ŭ Minsk 16—17 krasavika źjaŭlajecca vyvučeńnie mahčymaści palapšeńnia adnosinaŭ pamiž Jeŭrasajuzam i Biełaruśsiu.
«Vizit adbudziecca ŭ miežach naviedvańnia kamisaram usich šaści krain Uschodniaha partniorstva napiaredadni ryžskaha samitu», — paviedamiła pradstaŭnictva ES.
Apošni raz jeŭrakamisar pa pytańniach pašyreńnia i palitycy dobrasusiedstva naviedvaŭ Biełaruś u 2010 hodzie. Štefan Fiule, jaki zajmaŭ tady hetuju pasadu, dvojčy prylataŭ u Minsk — u lipieni i listapadzie.
Ciapier čytajuć
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ3
Kamientary