Siaroža ŭsio robić sam. Sam apranajecca ŭ škołu, sam čyścić ranicaj zuby, sam hatuje sabie na śniadanak buterbrody, sam dahladaje siastryčku, kali mamy niama doma. Nie tamu, što pra jaho niama kamu kłapacicca, a tamu, što Siaroža naohuł usio sam.
Viktoryja Kapskaja, žurnalist haziety «Infa-kurjer» (Słuck), śpiecyjalna dla časopisa «Imiony» niekalki dzion nazirała za žyćciom Siarožy, kab zrazumieć, jak heta — paznavać śviet tolki z dapamohaj słychu, niuchu i dotyku ŭ nievialikim biełaruskim horadzie.
— Siarhiej nikomu nie kaža, što nie bačyć, — raspaviadaje jaho mama Alena. — Dureje, chodzić śpinaj napierad, staić na hałavie … Jon taki ž, jak i ŭsie dzieci. Ale nie ŭsie heta razumiejuć. Adny ludzi, jakija viedajuć ab našaj prablemie, nie źviartajuć na nas uvahi, inšyja — hladziać na nas niby my nie z hetaj płaniety, trecija škadujuć, ciarpieńnia žadajuć.
Čytać całkam fotahistoryju pra chłopčyka sa Słucka na sajcie imenamag.by
Novy anłajn-časopis «Imiony» sumiesna z kraŭd-płatformaj Talaka.by zapuściła byłaja žurnalistka Tut.by Kaciaryna Siniuk.
Prajekt, jak raspaviała Kaciaryna karespandentu Radyjo Svaboda, niekamiercyjny:
«Ciapier my isnujom za košt sponsarstva «Tałaki», nadalej płanujem pakinuć prajekt niekamiercyjnym. Isnavać chočam najpierš za košt kraŭdfandynhu, budziem stvarać prajekty i źbirać hrošy na siabie i hanarary žurnalistam. Nie fakt, što heta budzie vielmi paśpiachova, bo kali niedzie ŭ Amierycy jość hramadskija ŚMI, jakija isnujuć całkam za košt adličeńniaŭ ludziej, to ŭ Biełarusi takoha dośviedu niama. Ale prynamsi jość kraŭdfandynh, tamu pasprabujem. I jość druhi šlach finansavańnia: chočam stvaryć niejkuju apiakunskuju radu i zaprašać tudy ludziej ź biznesu, jakija zmohuć stać miecenatami prajektu, kali paličać, što jon važny»
Kamientary