Siaredni zarobak u Biełarusi ŭ studzieni ŭpaŭ bolš čym na 80 rubloŭ
Siaredni studzieński zarobak u Biełarusi ŭpaŭ da 720,7 rubla, paviedamlaje Biełstat. Heta na 80,9 rubla mienš, čym u śniežni minułaha hoda.
U pieraliku na dalary pa siarednieŭzvažanym kursie Nacbanka siaredni zarobak biełarusaŭ u minułym miesiacy skłaŭ 370 dalaraŭ. U śniežni jana była roŭnaj 408 dalaram.
U Minskaj vobłaści siaredni zarobak u studzieni źniziŭsia da 723,7 rubla (-79,8 rubla ŭ paraŭnańni sa śniežniem), u Mahiloŭskaj - da 612,6 rubla (-53,4 rubla), u Bresckaj - da 608,7 rubla ( -94,1 rubla), u Homielskaj - da 646,1 rubla (-48 rubloŭ), u Viciebskaj vobłaści - da 611,5 rubla (-57,8 rubla), u Minsku - da 1027,6 rubla (-124, 2 rubla).
Zarpłata rabočych i słužačych u studzieni skłała 721,1 rubla. U śniežni jana była na ŭzroŭni 802 rubloŭ.
Studzieńskaja zarpłata zvykła mienš za śniežańskuju. U kancy hoda rabotnikam zvyčajna vypłačvajuć hadavyja premii, što ŭpłyvaje na statystyku.
Nahadajem, u listapadzie minułaha hoda Alaksandr Łukašenka zajaviŭ, što siaredni zarobak u 2017 hodzie treba viarnuć na ŭzrovień 500 dalaraŭ. Hałoŭnaja ŭmova - adpaviedny rost pradukcyjnaści pracy. Apošni raz taki zarobak biełarusy atrymlivali ŭ śniežni 2014 hoda. Paźniej ministr ekanomiki Uładzimir Zinoŭski vykazaŭsia, što zarobak u 500 dalaraŭ - «vielmi ciažkaja zadača».
Zarpłata ŭ 500 dalaraŭ - «nie zavobłačnaja ličba i nie papulizm», a realna dasiahalnaja ŭ hetym hodzie meta, zajaviŭ u kancy studzienia Alaksandr Łukašenka na sustrečy z navukovymi i navukova-piedahahičnymi rabotnikami.
Kamientary