Šatłandski sud nie pakaraŭ žančynu, jakaja zabiła muža paśla 50 hod ździekaŭ ź jaje
Sud šatłandskaha horada Hłazha pryznaŭ vinoŭnaj 73-hadovuju Siuzan Uiłsan, ale adpuściŭ dadomu biez pakarańnia, niahledziačy na toje, što ŭ vieraśni 2016 hoda jana zadušyła paduškaj svajho 70-hadovaha muža, paviedamlaje «The Sun».
Abaroncy abvinavačanaj zdoleli pierakanać sud, što da zabojstva žančynu, byłuju miedsiastru, daviali 50 hod rehularnaha źbivańnia i ździekaŭ z boku jaje muža, mieniedžara Hienry Uiłsana. U apošnija hady žyćcia ŭ muža Siuzan pačałasia depresija, jon navat ździejśniŭ niaŭdałuju sprobu samahubstva, i byŭ prykavany da łožka praz chraničnuju chvarobu serca.
Treciaha vieraśnia 2016 hoda muž paprasiŭ žonku prynieści telefon, kab parazmaŭlać sa znajomym. Kali Hienry Uiłsan pačaŭ abražać taho pa telefonie, žančyna nie vytrymała i pačała bić jaho zbanam, jaki trymała ŭ rukach, a paśla vybiehła z pakoju.
Kali jana nieŭzabavie viarnułasia, mužčyna lažaŭ na padłozie, a pobač była pustaja ŭpakoŭka ad lekaŭ, jakija jon prahłynuŭ usie. Jana pakłała muža ŭ łožak, a jon, ź jaje słovaŭ, pačaŭ prasić jaje: «Dapamažy mnie». Tady jana ŭziała padušku i zadušyła jaho.
«Ja zrabiła heta tolki praz spahadu da jaho, kali-niebudź heta pavinna było spynicca…», — skazała jana ŭ sudzie.
«Heta byŭ vielmi trahičny vypadak. U hetaj spravie isnujuć vyklučnyja abstaviny, i pakarańnie nie było b u intaresach pravasudździa. Hałoŭnaj pryčynaj było vaša psichičnaje zdaroŭje padčas śmierci vašaha muža, i niama padstaŭ mierkavać, što vy ŭjaŭlajecie jakuju-niebudź pahrozu dla hramadskaści», — skazała sudździa Ledzi Rej padčas abviaščeńnia prysudu.
Bok abvinavačańnia pryniaŭ vyniesieny sudom prysud z pryčyny «źmienšanaj adkaznaści padsudnaj za jaje dziejańni» praź niaspynny stres, u jakim žančyna znachodziłasia, žyvučy sa svaim mužam. Jany pražyli razam 50 hod i vychavali traich dziaciej.
Kamientary