Kamfort u horadzie — sprava nie tolki haradskoj administracyi. Sami haradžanie, razam z kulturnym zdabytkam minułych epoch, kožny dzień robiać jaho lepšym. Aŭstryjskaja Viena ŭ hetym płanie — "horad-standart" dla inšych jeŭrapiejskich stalic. Mienavita tut realizavany ceły kompleks ekałahičnych, kamunikacyjnych i kulturnych rašeńniaŭ, jakija niebiespadstaŭna robiać hety horad adnym z najlepšych pa ŭzroŭni kamfortu i jakaści žyćcia. Dziakujučy Priorbanku, jaki ŭvachodzić u aŭstryjskuju hrupu Raiffeisen Bank International, my daviedalisia ŭsio pra stalicu Aŭstryi i pobyt u joj ad piśmieńnika Viktara Marcinoviča. Zaviaršajem naš cykł "Aŭstryjski standart" padborkaj haradskich łajfchakaŭ, jakija my sustrakali, błukajučy pa zachaplalnaj Vienie. My ŭpeŭnienyja, što niekatoryja z hetych znachodak zmohuć zrabić jašče lepšaj i biełaruskuju stalicu.

Z Marcinovičam my byli ŭ Vienie ŭ pačatku sakavika, u "siezon" ledziašoŭ. Pieršaje, što kinułasia ŭ vočy jašče pa darozie ŭ hatel, — bieła-čyrvonyja mietaličnyja aharodžy, pastaŭlenyja pad vuhłom da budynkaŭ. Takoje ŭrbanistyčnaje rašeńnie aŭstryjskich kamunalnikaŭ zaścierahaje minakoŭ ad mahčymych incydentaŭ. Znaki amal nie zaminajuć špacyravać pa chodnikach, jany jarkija i zaŭvažnyja ŭsim i vykarystoŭvajucca šmat hadoŭ. Dla fiksacyi takoha znaka ŭ ścianie jość nievialiki kručok. I nie treba ŭzvodzić nijakich aharodžaŭ z usiaho, što trapiłasia pad ruki, na pałovu tratuara ci arkušaŭ A4 z tekstami pra "sasuli", jakija psujuć fasady, drenna čytelnyja i jašče niedarečna zastajucca visieć až da leta.

Navat pobač z hałoŭnaj turystyčnaj pierlinaj Vieny — saboram Śviatoha Štefana — staić šmat budynkaŭ roznych epoch. Viena ŭ hetym sensie — prykład maštabnaha kałarytu i fiłasofskaha staŭleńnia da «pryhoža-niepryhoža».

Tak, paraŭnoŭvać architekturnyja ansambli Vieny i Minska niedarečna. Ale, zdajecca, aŭstryjcy mienš rasstrojvajucca praz navabudy. Moža być, minčuki tamu tak baluča ŭsprymajuć čarhovy architekturny prajekt, bo «žyvoj historyi» tak mała na našych vulicach i jana zaŭsiody ŭ «mienšaści»?

Luby horad — dynamičnaja prastora kamunikacyj i samavyjaŭleńnia. I najaŭnaść albo adsutnaść u im hrafici demanstruje kamunikatyŭny ŭzrovień žycharoŭ. Chulihanstva i psavańnie majomaści siudy nie adnosicca — my nie pra heta. Ale ŭ lubym horadzie zaŭsiody znojdziecca miesca šerym ścienam i ludziam, jakim jość što skazać. Hrafici ŭ Vienie — takaja ž arhaničnaja častka vuličnaj atmaśfiery, jak i baročnyja budynki časoŭ Habsburhaŭ.

Kalarovyja palitry mieściacca navat u centry Vieny ŭ «techničnych zonach», jakija nie vykonvajuć anijakaj estetyčnaj funkcyi: na bietonnych padpornych ścienach, u arkach i prajezdach. Heta vyhladaje nastolki akuratna i arhanična, što navat nie ŭźnikaje dumki pra chulihanstva ci vandalizm.

Kanstrukcyi, skulptury, łaŭki i naviesy ŭ Vienie źjaŭlajucca pa inicyjatyvie dyzajnieraŭ, mastakoŭ i pradstaŭnikoŭ biznesu. Z hetym u Vienie — poŭnaja svaboda (za vyklučeńniem histaryčnaj častki horada), treba prosta ŭzhadnić placoŭku.

Jašče ŭ Vienie źviarnuŭ uvahu na samuju zvyčajnuju višu — suchuju bałotnuju travu. Jaje, jak ni dziŭna, u Vienie vykarystoŭvajuć u łandšaftnym dyzajnie. Vyhladaje heta vielmi pryhoža i nietypova. U biełaruskim "krai azior i bałot" takich raślin vielmi šmat, i jany jašče čakajuć śmiełych idej ad minskich łandšaftnych dyzajnieraŭ.

U Aŭstryi niama prablemy biesprytulnych žyvioł. Uładalniki chatnich hadavancaŭ płaciać niemałyja, navat pa aŭstryjskich maštabach, padatki. Uzamien haspadary atrymlivajuć dla siabie i svaich hadavancaŭ kamfortnyja ŭmovy: aharodžanyja placoŭki dla vyhułu i svabodu pieramiaščeńnia ŭ horadzie. Z sabakami ŭ Vienie dazvalajuć prachodzić amal usiudy: u parki adpačynku, kramy i navat muziei. Treba tolki vykonvać hihijeničnyja normy i mieć pavadok, namyźnik, a ŭ muziei nabyvać svajmu hadavancu kvitok. Miłaja detalka takoha kłopatu pra žyviołak u Vienie — śpiecyjalnyja «naviazy» la nievialikich kramak i kaviarniaŭ.