Baćkam niepaŭnaletnich dziaciej dali pa 15 sutak, dzieci zastalisia adny. Historyja taranu lehkavika milicejskim džypam u Minsku
Uviečary 11 žniŭnia pazadarožnik biez apaznavalnych znakaŭ uziaŭ na taran lehkavy aŭtamabil z pasažyrami. Pierad hetym amapaŭcy abstralali mašynu humavymi kulami. Historyja taranu lehkavika milicejskim džypam i jaho nastupstvaŭ, raskazanaja Svabodzie dačkoj zatrymanych Vieraj Šypinaj.
U sacyjalnych sietkach jość videa nadzvyčajnaha zdareńnia, jakoje adbyłosia ŭ rajonie stancyi mienskaha metro «Kamiennaja Horka» 11 žniŭnia, na treci dzień akcyjaŭ pratestu suprać falsyfikacyi vybaraŭ.
U salonie była siamiejnaja para Šypinych — Alaksiej i Aksana. Apošniaja — rodnaja siastra viadomaha režysera-kinadakumentalista Andreja Kuciły. Da jaho jany i jechali ŭ hości — vyjaždžali vulicaj Łabanka ŭ bok kalcavoj darohi.
«Vybiahajuć specnazaŭcy i pačynajuć stralać pa dźviarach mašyny»
Što pasłužyła padstavaju takoj ahresiŭnaj reakcyi ekipavanych specnazaŭcaŭ — pakul nieviadoma. Ale niepaŭnaletnich dziaciej 13 i 17 hadoŭ praz telefon painfarmavali, što baćki atrymali pa 15 sodniaŭ aryštu kožny i ciapier znachodziacca ŭ SIZA Žodzina.
«Usio jak zvyčajna: ruchalisia ŭ ahulnym patoku, — raskazvaje akaličnaści nadzvyčajnaha zdareńnia 17-hadovaja Viera Šypina. — Usio heta bačna na videa. I tut vybiahajuć specnazaŭcy i pačynajuć stralać pa dźviarach mašyny. A paśla z supraćlehłaha boku nalataje bieły džyp i taranić. Tata sprabavaŭ uchilicca, u vyniku vyskačyli na sustrečnuju pałasu, dzie ich prycisnuli da ŭzbočyny. Baćku skrucili, mamu vyciahnuli i zahadali pakłaści ruki na kapot».
Jak bačna na videa, paśla hetaha nieidentyfikavanyja pasažyry pazadarožnika adčynili bahažniki abiedźviuch mašynaŭ, ale niezrazumieła, dziela čaho, praciahvaje Viera. Prynamsi nie vidać, ci niešta sprabavali padkinuć, bo bahažnik ichnaha aŭtamabila byŭ absalutna pusty.
«U hety momant ja nabrała mamu, kab daviedacca, ci dajechali jany da Andreja, — kaža dziaŭčyna. — I čuju: «Viera, nas zatrymali, raźbili mašynu, my ŭ busie». Navat nie aŭtazak, a niejki mikraaŭtobus ź cichušnikami, nie amapaŭcy… Učora ničoha dabicca nie ŭdałosia, siońnia ź dziasiataha razu dazvaniłasia na 102, pakinuła zajaŭku, što baćkoŭ skrali, ja i moj niepaŭnaletni brat zastalisia adny. Nieŭzabavie zvanok — dyspetčar Frunzenskaha RUUS. Maŭlaŭ, baćkoŭ nie znajšli, vy tam trymajciesia.
Praź niekalki hadzinaŭ sama znoŭ nabrała i mianie «supakoili»: znajšlisia ŭ Žodzinie, atrymali pa 15 sodniaŭ kožny. Za što — nieviadoma».
«Dno budzie tady, kali pačnuć stralać u ludziej bajavymi»
Viera nie razumieje: jak takoje mahčyma, kab pakinuli dziaciej biez baćkoŭ? Zrešty, jana sumniajecca, što sud byŭ uvohule, chutčej za ŭsio, abyšlisia vyjaznymi «trojkami». Niama peŭnaści, ci pakinuli ich u Žodzinie, bo była infarmacyja, što praź pierapaŭnieńnie kameraŭ niekatorych vyvoziać u Barysaŭ i Smalavičy.
«My nia viedajem, dzie jany, pahatoŭ aryštantaŭ pavinny rassadžvać pa mužčynskich i žanočych «adździaleńniach», — havoryć Viera Šypina. — Nie razumiejem pakul, što rabić. Treba było b advieźci pieradaču — ciapier choładna, a jany byli lohka apranutyja, ale siońnia dakładna nie paśpiejem, bo da 17.00 pryjom. Budziem staracca zaŭtra…»
Aksanu i Alaksieja zatrymlivali jak «terarystaŭ» ci ŭzbrojenych «bandziukoŭ», kaža Andrej Kuciła.
«Prynamsi tak vyhladaje na videa: padrazajuć, vyšturchoŭvajuć praź niekalki pałosaŭ, pryciskajuć. Davoli brutalna. Razumieju, što spačatku Alaksiej navat chacieŭ ich abjechać, bo nieviadoma, što za ludzi, mašyna nie milicejskaja, biez syrenaŭ, apaznavalnych znakaŭ. Jak takoje mahčyma? Viartańnie ŭ «lichija 1990-ja»? Kab byli daišniki — heta adno. A tut niejkija «bratki». Pačali stralać, jasna, što pieršaja reakcyja — ratavacca. Prosta kapiec. Ujaŭlaju, u jakim jany byli šoku. Padbili mašynu jakraz z taho boku, dzie siadzieła siastra».
Mašyny ŭ tym miescy, dzie Šypinym daviałosia jaje kinuć, užo niama. Andrej Kuciła dapuskaje, što jaje adciahnuli na štrafnuju placoŭku, pakul pošukami jon nie zajmaŭsia. Inšaja reč — ci atrymajecca jaje zabrać biez dakumentaŭ, jakija zastalisia ŭ haspadaroŭ techniki? Tym časam kožny dzień «zachavańnia» kaštuje 60 rubloŭ.
«Dno jašče nie prabitaje. Dno budzie tady, kali pačnuć stralać u ludziej bajavymi, voś heta budzie finiš. U Bieraści ŭžo pasprabavali, čamu nie raspaŭsiudzić dośvied na inšyja rehijony? U hetaj sytuacyi pakul dzivić adno: čamu niama strajkaŭ pa krainie? Tolki strajkami, tolki ŭździejańniem na ekanomiku možna hetaje biezzakońnie spynić», — padsumoŭvaje Andrej Kuciła apošnija padziei ŭ siamji i krainie.
Reakcyja MUS
Presavaja sakratarka MUS Biełarusi Volha Čamadanava vysłuchała infarmacyju pra hety vypadak, zapisała proźviščy zatrymanych i abiacała, što ŭ viedamstvie raźbiarucca i paźniej infarmujuć Svabodu.
Ciapier čytajuć
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ3
Kamientary