U centry Minska dahetul staić biaroza, jakaja nie skinuła listy. Što ź joj nie tak?
Na minskim praśpiekcie Niezaležnaści kala Pałaca Respubliki dahetul staić biaroza ź listami, prytym mnohija ź ich zialonyja. Jaje, zdajecca, zusim nie chvaluje, što pryjšła zima, vypaŭ śnieh i ŭdaryli marazy. Čamu dreva nie skinuła liście, ahienctvu «Minsk-Naviny» raskazaŭ staršy navukovy supracoŭnik łabaratoryi intradukcyi draŭnianych raślin Centralnaha bataničnaha sadu NAN Biełarusi Michaił Rudzievič.

«Adnoj z pryčyn hetaj źjavy stała mahutnaja aśviatlalnaja lampa, jakaja znachodzicca pobač ź biarozaj, — tłumačyć śpiecyjalist. — Nie viedaju, nakolki mocna jana moža sahreć dreva. Ale
na pažaŭcieńnie i skidańnie liścia ŭpłyvaje mienavita praciahłaść śvietłavoha dnia. Lichtar «padmanvaje» raślinu.
U narmalnych umovach biarozy mianiajuć afarboŭku ź vieraśnia. U zaležnaści ad nadvorja da pieršaj dekady listapada listota apadaje. Tut ža z-za štučnaha aśviatleńnia jana praciahvaje viehietavać».
Taksama śpiecyjalist raskazaŭ, što na stan biarozy mahli paŭpłyvać trubapravody ciepłavych sietak. Kamunikacyi padahrajuć hlebu i pavietra, što taksama ŭpłyvaje na terminy skidańnia listoŭ.

Kali tempieratura apuskajecca nižej za +16 °C, raślina razumieje, što nastupiła vosień. Jana zabiraje ź liścia zialony pihmient — chłarafił, tamu što ŭ im utrymlivajecca šmat azotu. Žyćciova važny elemient praciahvaje akumulavać u stvale, halinach i karaniovaj sistemie. A pakolki hetamu drevu ciopła, to z nadychodam marazoŭ liście «zakansiervavałasia».
«Dla raśliny heta drenna — jana nie zabrała ź listoty nieabchodnyja karysnyja rečyvy, — robić vysnovu Michaił Rudzievič. —
Kancy parastkaŭ nie paśpieli adraŭnieć, tamu jany albo padmierznuć, albo pažuchnuć. Kali pry budaŭničych rabotach nie byli abrezanyja karani dreva, to dumaju, što viasnoj jano zmoža adnavicca. Ale vyhlad u jaho budzie nie najlepšy».
Kamientary