Ultramarafon pačaŭsia ŭčora ŭ Murmanskaj vobłaści. Z-za składanych umoŭ nadvorja jaho chacieli admianić, ale pieradumali i dali start. U vyniku 6 lipienia ranicaj padčas masavaha zabiehu pa harach u Kiraŭsku zahinuli dvoje jaho ŭdzielnikaŭ.
Padčas ultramarafonu «Chibiny», što prachodziŭ u Murmanskaj vobłaści, zahinuli dva čałavieki — 61-hadovaja žycharka Sankt-Pieciarburha i 47-hadovy maskvič. Jašče dvoje ŭdzielnikaŭ byli špitalizavanyja ŭ stanie siaredniaj ciažkaści.
Spabornictvy raspačalisia napiaredadni, kali ŭdzielniki ŭžo padnialisia ŭ hory. Adnak nadvorje rezka pahoršyłasia: na pieravale byŭ mokry śnieh, viecier chutkaściu zvyš 20 m/s i tempieratura kala nula.
Pavodle papiarednich źviestak, pryčynaj śmierci stała pieraachaładžeńnie. Udzielniki vymušanyja byli biehčy pa ślizkich kamianiach i zaśniežanych ciaśninach.
Arhanizatary marafonu, jak śćviardžajecca, za dva dni da pačatku razhladali mahčymaść skasavać mierapryjemstva z-za drennaha prahnozu nadvorja i rekamiendacyj MNS.
Usie zabiehi, zapłanavanyja na hety dzień, skasavanyja. Ultramarafoncaŭ, jakija dabiehli da kantrolnaha punkta, ciapier rychtujuć da evakuacyi.
Śledčy kamitet RF raspačaŭ kryminalnuju spravu pavodle artykuła ab akazańni pasłuh, što nie adpaviadajuć patrabavańniam biaśpieki dla žyćcia i zdaroŭja.
Ultramarafon — heta vid biehavych spabornictvaŭ, jakija pieravyšajuć standartnuju marafonskuju dystancyju ŭ 42 kiłamietry. Zvyčajna heta zabiehi na 50, 100, 160 km i bolš, abo spabornictvy, dzie treba prabiehčy jak maha bolšuju adlehłaść za vyznačany čas (naprykład, za 12 abo 24 hadziny).
Časta ŭltramarafony prachodziać pa składanych maršrutach: u harach, pa biezdarožžy, pa pustyniach ci ŭ ciažkich klimatyčnych umovach.
Ciapier čytajuć
Były viadučy BT, jaki zvolniŭsia ŭ 2020-m i vyjechaŭ u Słavakiju, raskazaŭ, jak žyvie ciapier2
Kamientary