U polskim horadzie Płonsk 16‑hadovy padletak napaŭ na dvuch biełarusaŭ, vykarystoŭvajučy hazavy bałončyk. Padčas vobšuku ŭ jaho domie palicyja znajšła kala 400 hramaŭ amfietaminu, paviedamlaje palicyja Mazavieckaha vajavodstva.
Zdareńnie adbyłosia ŭviečary 10 kastryčnika. Dvoje biełarusaŭ — 53 i 35 hadoŭ — razmaŭlali na vulicy pa-rusku. Da ich padyšli troje padletkaŭ i spytali, chto jany pa nacyjanalnaści. Daviedaŭšysia, što pierad im biełarusy, adzin z chłopcaŭ zajaviŭ, što «takich nie lubiać», paśla čaho raspyliŭ u ich bok ślozatačyvy haz i ŭdaryŭ adnaho z mužčyn bałončykam pa hałavie.
Na miesca prybyli palicyja i chutkaja dapamoha. Paciarpiełaha dastavili ŭ balnicu. Napadnika chutka znajšli — im akazaŭsia miascovy 16‑hadovy žychar. Jaho zatrymali i dapytali. Spravu pieradaduć u sud pa spravach niepaŭnaletnich. Padletku vystaŭlenyja abvinavačańni ŭ abrazie hramadzian Biełarusi pa nacyjanalnaj prykmiecie i ŭ parušeńni ich niedatykalnaści.
Padčas vobšuku ŭ domie padletka palicyja znajšła pakiet ź biełym paraškom — amal 400 hramaŭ amfietaminu. 46‑hadovy baćka chłopca spačatku śćviardžaŭ, što nie viedaje, što heta, ale paźniej pryznaŭsia, što narkotyki naležać jamu. Mužčynu aryštavali, a dziaciej pieradali pad apieku svajakoŭ.
Raptoŭna pamior Uładzimir Usier — niemałady aktyvist, jaki ŭlapaŭsia ŭ film BT i špijanaž u Polščy27
Kamientary