Chram Sahrada Familija ŭ Barsiełonie staŭ samym vysokim u śviecie. Na jaho pastavili pieršuju častku kryža
Budaŭniki barsiełonskaha chrama Śviatoha Siamiejstva (Sahrada Familija) uźniali na jaho centralnuju viežu pieršuju častku kryža. Paśla hetaha zbudavańnie dasiahnuła vyšyni 162,91 mietra i takim čynam stała samym vysokim chramam u śviecie, piša Bi-bi-si.
Hety rekord z 1890 hoda ŭtrymlivaŭ Ulmski sabor (carkvu, jakuju pačali budavać u XIV stahodździ i dabudavali ŭ XIX), jaho vyšynia składaje 161 mietr.
Chram Sahrada Familija architektara Antonia Haudzi budujecca ŭžo bolš za 100 hadoŭ, ale jaho asnoŭny budynak pavinien być całkam skončany ŭ nastupnym hodzie.
Na praciahu najbližejšych niekalkich miesiacaŭ na centralnaj viežy Isusa Chrysta buduć ustalavany astatnija častki kryža — i paśla hetaha jaje vyšynia dasiahnie 172 mietraŭ.
Pieršy kamień chrama Sahrada Familija byŭ zakładzieny ŭ 1882 hodzie, a na nastupny hod jaho budaŭnictva ŭznačaliŭ tady jašče małady architektar Antonia Haudzi.
Zatym hetaja carkva pieratvaryłasia ŭ hałoŭny prajekt jaho žyćcia: jon całkam pierapracavaŭ aryhinalny dyzajn zbudavańnia, jakoje pavinna było stać adnosna ścipłym chramam, uźviedzienym na dabračynnyja achviaravańni viernikaŭ.
U momant śmierci Haŭdzi ŭ 1926 hodzie była ŭźviedziena tolki adna z 18 zapłanavanych im viežaŭ.
U nastupnyja hady chram pastupova dabudoŭvaŭsia, i pracesam kiravaŭ Fond Sahrada Familija, jaki atrymlivaje srodki ad prodažu biletaŭ i pryvatnych donaraŭ.
Za amal paŭtara stahodździa budaŭnictva sutykałasia z mnohimi prablemami.
Padčas hramadzianskaj vajny ŭ Ispanii katałonskija anarchisty padpalili padziemnuju kryptu, u vyniku čaho byli źniščany čarciažy i makiety budynka, vyrablenyja Haudzi.
Akramia taho, raboty ŭ chramie byli na niekatory čas spynieny padčas pandemii kavidu. U fondzie Sahrada Familija paviedamlali, što heta źviazana ź niedachopam pastupleńniaŭ ad prodažu biletaŭ.
Adnak u vieraśni minułaha hoda hienieralny dyrektar fonda Chaŭjer Marcinies skazaŭ ahienctvu Associated Press, što centralnuju viežu Isusa Chrysta dabudujuć u 2026 hodzie, kali budzie adznačacca stahodździe z dnia śmierci Haudzi.
U honar architektara, pachavanaha ŭ krypcie chrama Śviatoha Siamiejstva, budzie praviedziena niekalki pamiatnych mierapryjemstvaŭ.
Budaŭniki praciahnuć pracavać nad zakančeńniem chrama na praciahu nastupnaha dziesiacihodździa: u tym liku jany stvorać novyja dekaratyŭnyja elemienty i skulptury, a taksama pabudujuć leśvicu da hałoŭnaha ŭvachodu ŭ zbudavańnie.
Kamientary