Žaśmin z Adesy vyrašyła stvaryć u Biełarusi brend hałaŭnych uboraŭ dla musulmanak. I atrymała chvalu nianaviści
Pra svaju ideju Žaśmin Takcha raspaviała ŭ Threads. Dziaŭčyna-musulmanka napisała, što try miesiacy tamu pierajechała z Adesy ŭ Minsk i ciapier płanuje raźvivać svoj biźnies. Žaśmin cikavicca modaj, tamu choča stvaryć u Biełarusi brend hałaŭnych uboraŭ dla musulmanak. Skončyła dopis jana frazaj: «Usim asalam alejkum». I pačałosia.
Dopis sabraŭ užo pad dźvie tysiačy kamientaroŭ. I mnohija ź ich ahresiŭnyja. Čaściej za ŭsio dziaŭčynie ŭ hrubaj formie raili jechać u musulmanskija krainy — u pieršuju čarhu ŭ Afhanistan.
«Pryvoziačy da nas hałaŭnyja ŭbory dla musulman, nie zabyvajcie, što Biełaruś — heta radzima jaŭrejaŭ», — napisała adna z kamientatarak i nabrała 2400 łajkaŭ.
«I da RB dabralisia sa svaimi anučami, ale tut hetaja historyja nie projdzie, tut cyvilizavanaje sučasnaje hramadstva», — aburyłasia inšaja i atrymała 1300 łajkaŭ u padtrymku svajho mierkavańnia.
U kamientarach nahadvali taksama, što tatary, jakija taksama musulmanie, ŭ Biełarusi vyhladali inakš.
Jašče adna žančyna adznačyła, što «moža, Biełaruś i haścinnaja, ale nie ślapaja, i cudoŭna bačyć, što robiać musulmanie ŭ ES», — ź joj pahadziłasia 1200 čałaviek.
Inšaja patrabuje nie čapać Biełarusi: «U nas pravasłaŭnyja i kataliki. Ale heta ludzi, jakija bolš za adekvatnyja. Bolš za toje, my nie hublajem zdarovaha sensu i žyviom z Boham u dušy, a nie napakaz. Ja pieršaja vyjdu suprać vas! Ja karennaja biełaruska i majo prava nie addavać vam svaju krainu! Marš u isłamskija krainy!»
«Skažycie potym adras kramy, pasprabuju pobač z vami adkryć łaŭku sa śvininaj na palicach».
«Čamadan, vakzał, Afhanistan».
Niekatoryja nie strymlivalisia ŭ vyrazach i nazyvali žančyn u chidžabach «zamataškami».
U kamientary pryjšła navat biełaruskaja dyzajnierka Volha Novik, stvaralnica brendu Ton-in-ton: «My nie musulmanskaja kraina. Nie treba tut musulmanstva nasadžać. Chočacie być dyzajnierkaj, chočacie być biełaruskaj — my nie suprać. My rady ŭsim, niezaležna ad etničnaha pachodžańnia. Biełarusy talerantnyja. Adnak pavažajcie i raźvivajcie našu kulturu, našy tradycyi i naš fešn jak biełaruski fešn».
Ale mnohija abaraniali dziaŭčynu ŭ kamientarach i pisali, što ŭ šoku ad takoj nietalerantnaści biełarusaŭ.
«A kažuć, biełarusy dobraja nacyja, čytaju kamienty i ŭ šoku ad ahresii, — napisała adna z žančyn. — Ja biełaruska. Ja suprać rasavaj i nacyjanalnaj varažniečy.
U kožnaha z nas jość svaje strachi i miežy, ja taksama nie zaŭsiody adčuvaju siabie spakojna pobač z mužčynami ź niekatorych kultur. Ale heta nie nahoda vylivać usiu hetuju tryvohu na kankretnuju dziaŭčynu. Jana nikomu nie naviazvaje svaju kulturu, prosta sprabuje pracavać. Jaje biźnies, mahčyma, nie stanie papularnym u nas, i heta narmalna. Nienarmalna toje, što adbyvajecca ŭ kamientarach».
Sama ž Žaśmin sprabuje nie hublać aptymizmu. Jana napisała, što ŭsio dumała, jak pryciahnuć uvahu novych padpisčykaŭ, musulmanak Biełarusi — prydumvała scenaryi dla ryłsaŭ, jak lepš źniać, dzie śviatło pastavić…
Ale adzin dopis u Threads dapamoh joj stać minskaj znakamitaściu.
Ciapier čytajuć
Pamiatajecie niemaładoha aktyvista, jaki pa duraści źniaŭsia ŭ prapahandysckim kino BT? U Polščy jon ulapaŭsia jašče i ŭ špijanaž5
Kamientary
[Zredahavana]
Mabyć heta taksama chajpuje ? Adesa śpiecyfičnaje miesta