Biełaruskaja kryłataja rakieta trapiła ŭ Dubaj pad vyhladam sumiesnaj raspracoŭki z AAE
Na vystavie Dubai Airshow 2025 šyroki rozhałas atrymała novaja ŭdarnaja sistema na asnovie tannaj kryłataj rakiety LCCM Mk2, jakaja padajecca jak sumiesnaja raspracoŭka Biełarusi i AAE. Adnak žurnalisckaje rasśledavańnie pakazała, što klučavuju rolu ŭ prajekcie adyhryvaje ambicyjny zbrojevy biznesmien Chabib Bucharuba — uradženiec Ałžyra, były piłot VPS Francyi, jaki ŭžo šmat hadoŭ zajmajecca supracoŭnictvam u halinie ŭzbrajeńniaŭ u roznych krainach, časta ŭ sumnieŭnych schiemach, piša Reform.news.
E-Systems Solutions, praź jakuju pracuje Chabib Bucharuba, isnuje ź siaredziny 2010-ch. Aficyjna heta nievialikaja kampanija z ofisami ŭ Abjadnanych Arabskich Emiratach, ale ŭ minułym Bucharuba ŭžo traplaŭ u skandały — ad niezakonnaj madernizacyi bajavoj avijacyi Čada da sumnieŭnych pastavak u Ałžyr i ŭdziełu ŭ sarvanaj ździełcy pa pastaŭcy francuzskich źniščalnikaŭ Mirage u Indanieziju.
Šerah sistem, jakija E-Systems Solutions demanstruje na mižnarodnych vystavach, padazrona nahadvajuć raspracoŭki biełaruskaha VPK. Tak, sistemy REB, hranatamioty i inšyja pradukty vyhladajuć jak praktyčna identyčnyja z vyrabami «Biełśpiecźnieštechniki» i «OKB TSP». U červieni 2025 hoda E-Systems Solutions navat vystaviła rakietny kompleks «Buk-MB2K» jak ułasnuju raspracoŭku, choć jon stvoranny biełaruskim «OKB TSP».
Heta navodzić na dumku, što kampanija Bucharuby moža vystupać «prakładkaj» dla abychodu sankcyj suprać biełaruskaha abaronnaha siektara.
Asablivuju intryhu dadaje toje, što apošnija vizity Alaksandra Łukašenki ŭ krainy, dzie aktyŭna pracuje Bucharuba (Indaniezija, Mjanma, Ałžyr), supadajuć ź intaresami hetaha zbrojevaha dylera. Jak miarkujuć žurnalisty, suviaź moža isnavać praz starejšaha syna Łukašenki — Viktara, jaki, imavierna, kuryruje supracoŭnictva ŭ halinie ŭzbrajeńniaŭ.
«Siensacyjnaja» rakieta LCCM Mk2, jakuju pakazali ŭ Dubai, vyhladaje jak adzinkavy dośledny ŭzor, jaki navat jašče nie prajšoŭ vyprabavańni. U ŚMI prahučali vielmi ambicyjnyja taktyka-techničnyja charaktarystyki, ale dakładnych śviedčańniaŭ pra mahčymaści rakietnaha kompleksu pakul niama.
U vyniku atrymlivajecca, što «emiracka-biełaruskaja» rakieta — heta, chutčej za ŭsio, prajekt, dzie Biełaruś praz pasrednictva Chabiba Bucharuby sprabuje vyjści na novyja rynki i abyści sankcyjnyja abmiežavańni.
Ukrainski biznesmien, abvieščany na radzimie ŭ vyšuk, vykarystoŭvaŭ biełaruskija banki dla praviadzieńnia roznych schiem
«Arešnik» nam patrebny, a «Pasiejdon» i «Buravieśnik» — nie. Łukašenka — pra zadačy dla VPK
Ideołahi raskazvajuć narodu žachi pra internet i pieraścierahajuć ad vykarystańnia ChatGPT
Kamientary