Manachiniam, jakija źbiehli z doma sastarełych u svoj manastyr, dazvolili zastacca tam pry ŭmovie, što jany pakinuć sacsietki
Trom pažyłym manachiniam, jakija źbiehli z doma dla sastarełych u Aŭstryi, dazvolili viarnucca ŭ ich začynieny manastyr da dalejšych rasparadžeńniaŭ. Adnak carkoŭnyja ŭłady vystavili ŭmovy: manachini pavinny spynić publikavać dopisy ŭ sacyjalnych sietkach. Za čas supraćstajańnia z carkoŭnym načalstvam siostry stali vielmi papularnyja: u ich amal sotnia tysiač padpisčykaŭ u instahramie, paviedamlaje Bi-bi-si.
Manachini Aŭhuścinskaha ordena Biernadeta (88 hadoŭ), Rehina (86 hadoŭ) i Ryta (82 hady) byli apošnimi siostrami manastyra Holdenštajn u nievialikim horadzie Elśbieten, pad Zalcburham u Aŭstryi. U im jany praviali dziasiatki hadoŭ, a potym siaredniaviečny budynak byŭ pieradadzieny novamu ŭładalniku. U śniežni 2023 hoda manachiń, jak jany śćviardžajuć, suprać ich voli zabrali z manastyra i pieraviali ŭ pansijanat, pryznačany dla pažyłych słužycielnic carkvy.
U vieraśni jany z dapamohaj byłych vučanic i ślesara viarnulisia ŭ zakryty manastyr, što vyklikała abureńnie carkoŭnych čynoŭnikaŭ.
Markus Hrasl, kiraŭnik abactva Rajchierśbierh, pad jurysdykcyjaj jakoha znachodzicca manastyr, nazvaŭ učynak manachiń całkam niezrazumiełym i zaklikaŭ ich viarnucca ŭ dom sastarełych. Na jaho dumku, samastojnaje žyćcio ŭ pustym budynku ŭjaŭlaje pahrozu žyćciu i zdaroŭju pažyłych žančyn, i rašeńnie ab ich pieravodzie ŭ pansijanat było pryniata dziela ich ža dabra.
Historyja manachiń stała šyroka viadomaj. U ich źjaviłasia mnostva prychilnikaŭ, jakija dapamahli im ź ježaj, elektryčnaściu i navat administravańniem sacsietak. Zaraz u manachiń Holdenštajna amal 100 tysiač padpisčykaŭ u instahramie i niekalki tysiač — u fejsbuku.
U sacsietkach publikujucca videa ź ich paŭsiadzionnaha žyćcia: siostry za malitvaj i za abiedam, siastra Ryta na treniroŭcy. Niadaŭna joj padaryli baksiorskija palčatki.
Praz amal try miesiacy supraćstajańnia pres-sakratar probstva Charald Šyfl paviedamiŭ aŭstryjskamu ahienctvu APA, što manachini mohuć pakul zastacca ŭ manastyry, ale pry peŭnych umovach. Akramia admovy ad aktyŭnaści ŭ sacyjalnych sietkach, jany pavinny zabiaśpiečyć niedastupnaść zakrytaj častki manastyra dla ludziej, jakija nie naležać da ordena. Kali jany zastanucca na hetych umovach, im budzie zabiaśpiečana miedycynskaja dapamoha i duchoŭnaja padtrymka z boku śviatara. Heta adbyłosia paśla sustrečy ŭ pačatku tydnia, na jakoj była prapanavana mahčymaje vyrašeńnie kanfliktu.
Pakul što manachini svajoj zhody nie dali.
«Ciapier usio zaležyć ad siaścior», — skazaŭ Charald Šyfl ahienctvu APA.
Zamak Holdenštajn słužyć manastyrom z 1877 hoda. Paśla pry im była adkryta pryvatnaja škoła dla dziaŭčynak, kudy z 2017 hoda prymajuć i chłopčykaŭ. Škoła pracuje da hetaha času.
Try manachini praviali ŭ manastyry bolšuju častku svajho žyćcia.
Siastra Biernadeta sama vučyłasia ŭ hetaj škole, trapiŭšy tudy padletkam u 1948 hodzie. Adnoj ź jaje adnakłaśnic była aŭstryjskaja aktrysa Romi Šnajder — adna z najbujniejšych kinazorak 1960— 70‑ch hadoŭ.
Siastra Rehina prybyła ŭ manastyr u 1958 hodzie, a siastra Ryta — u 1962 hodzie.
Usie try manachini zatym doŭhija hady pracavali ŭ škole vykładčykami. Siastra Rehina navat była dyrektaram.
Ale kolkaść manachiń pastupova skaračałasia. U 2022 hodzie budynak byŭ pieradadzieny archijeparchii Zalcburha i abactvu Rajchierśbierh — aŭhuścinskamu manastyru.
Probst Markus Hrasl z abactva Rajchierśbierh staŭ ich nastajacielem, a abščyna była aficyjna raspuščana ŭ pačatku 2024 hoda.
Astatnim manachiniam dali prava pažyćciovaha pražyvańnia, pakul dazvalała zdaroŭje i kahnityŭny stan.
U śniežni 2023 hoda było pryniata rašeńnie pieravieści ich u katalicki dom sastarełych, dzie jany adčuvali siabie niaščasnymi.
U pačatku vieraśnia siastra Biernadeta, siastra Ryta i siastra Rehina viarnulisia nazad u manastyr pry padtrymcy hrupy byłych vučanic. Jany tady zajavili Bi-bi-si, što nie płanujuć jaho pakidać.
«Pierš čym pamierci ŭ tym domie sastarełych, ja lepš pajdu na łuh i ŭvajdu ŭ viečnaść takim čynam», — skazała siastra Biernadeta.
Ciapier čytajuć
U biełaruskija pašparty buduć upisvać hrupu kryvi9
Kamientary