Jak u Breście adkryvali tabličku z QR-kodam — z čynoŭnikami, śviatarom i školnikami ŭ stojcy «zvažaj!»
U Breście ŭ ramkach prajekta «Ličbavaja zorka» adkryli čarhovuju tabličku z QR-kodam. Hetym razam — pad miemaryjalnaj doškaj maršała SSSR Hieorhija Žukava, što na ŭvachodzie ŭ himnaziju №6 u Paŭdniovym mikrarajonie, piša BGmedia.
Školnikaŭ prymusili stajać pa stojcy «zvažaj!» padčas adkryćcia tablički
Zvyčajnaj ustanoŭki tablički z QR-kodam było mała, tamu z hetaha zrabili pakazušnaje mierapryjemstva, nazvaŭšy jaho pamiatnym. U im paŭdzielničali čynoŭniki i, miarkujučy pa fotazdymkach, miascovy śviatar. Navošta jon tam patrebny, nieviadoma.
A navučencaŭ himnazii vyvieli na vulicu i pastroili ŭ rad. Dźvie vučanicy i ŭvohule stajali pad tabličkaj pa stojcy «zvažaj!». Vidać, achoŭvali.
Namieśnik kiraŭnika administracyi Maskoŭskaha rajona Bresta Ała Uljanickaja zajaviła padčas hetaj padziei, što «zachavańnie histaryčnaj pamiaci źjaŭlajecca adnoj z asnoŭ duchoŭnych i kulturnych tradycyj biełaruskaha naroda, jakaja zabiaśpiečvaje nierazryŭnuju suviaź pamiž minułym i sučasnaściu na šlachu miru i stvareńnia».
U narmalnaj praktycy takija tablički ŭstaloŭvajucca spakojna i bieź lišniaha šumu. Heta zručny sposab daviedacca bolš infarmacyi pra čałavieka ci niejkuju padzieju. Ale ŭ ideałahičnym paradku dnia navat tablička stanovicca padstavaj dla pratakolnaha rytuału.
Tamu što treba niešta adkryć. I niedzie dać spravazdaču.
Brestčanie, jakija ŭbačyli ŭ sacsietkach hetu navinu i fotazdymki, nie mahli strymacca.
«Štości ja spačatku padumaŭ, što miemaryjalnuju došku novuju paviesili. A tut, akazvajecca, usiaho tolki tabličku z QR-kodam źnizu prykrucili da ściany».
«Uračystaje adkryćcio tablički? Uračystaje? Surjozna?»
Što za prajekt «Ličbavaja zorka»
«Ličbavaja zorka» — heta prajekt BRSM pa aličbavańni pamiatnych miescaŭ jak na terytoryi Biełarusi, tak i pa ŭsim śviecie, źviazanych z padziejami Vialikaj Ajčynnaj vajny.
Pavodle zadumy ŭładaŭ, prajekt nakiravany na «farmiravańnie duchoŭna-maralnych, hramadzianskich jakaściaŭ asoby, na raźvićcio cikavaści i pavahi da pomnikaŭ bajavoj słavy, jakija ŭviekaviečyli trahičnyja i hieraičnyja padziei minułaha».
Znakavym miescam prysvojvajuć QR-kod, praź jaki možna pierajści na sajt prajekta ź infarmacyjaj pra padziei, što tam adbyvalisia. Naturalna, z punktu hledžańnia ciapierašnich uładaŭ.
Viadoma, što da 3 traŭnia 2024 hoda ŭ Breście adkryli 15 takich tabličak z QR-kodami. A z tych časoŭ prajšło paŭtara hoda. Možna ŭjavić, kolki za hety čas adkryli jašče.
Ciapier čytajuć
«Vyzvalali niemcaŭ ad fašyzmu, a sami zastavalisia ŭ tym ža dziarmie». Apublikavana treciaja častka ŭspaminaŭ Ryhora Biarozkina pra savieckija represii3434
Kamientary
2. Prajekt z QR-kodami niebiaśpiečny. Kody mohuć zamianić i heta doŭha nichto nie zaŭvažyć. Naprykład, na rekłamu narkotykaŭ, abo, jašče horš, na ekstremisckuju vyjavu bčb u vikipiedyi.