Лукашэнка і Назарбаеў могуць выступіць супраць пашырэння Мытнага саюза
Такое меркаваньне выказаў напярэдадні візыту Аляксандра Лукашэнкі ў Казахстан прадстаўнік гэтай краіны ў Асацыяцыі памежнага супрацоўніцтва Марат Шыбутаў.
На яго думку Астана і Менск могуць выступіць адзіным фронтам супраць пашырэньня мытнага саюзу за кошт Армэніі і Кіргізстану.
Ерэван прыняў нядаўна палітычнае рашэньне аб уступленьні ў інтэграцыйнае аб'яднаньне. Бішкек, у сваю чаргу, распрацоўвае «дарожную мапу» па ўступленьні ў мытны саюз і нават выступае з ініцыятывай стварэньня новых інстытутаў у рамках саюзу.
Шыбутаў упэўнены: «Беларусь і Казахстан паспрабуюць выпрацаваць сумесны плян дзеяньняў па гэтым пытаньні. Мяркую, стаўленьне да гэтага ўступленьня будзе адмоўным.
Нашы краіны не павінны пакутаваць з-за незадаволенага эга Уладзімера Пуціна і яго ўнутрыпалітычных праблем». Варта адзначыць, што афіцыйны Менск падзяляе ня ўсе падыходы Казахстану да Мытнага саюзу.
На мінулым тыдні прэм'ер Беларусі Міхаіл Мясьніковіч падчас сустрэчы кіраўнікоў урадаў мытнага саюзу ў Астане ацаніў прапановы Казахстану па стварэньні Эўразійскага саюзу наступным чынам: «Сёння прапануецца разгледзець прапанову казахстанскага боку — тое, што тычыцца асабліва інстытуцыйнай часткі.
Прапануецца новая структура саюзу. Шчыра кажучы, для нас, можа быць, з-за недахопу інфармацыі, не зусім зразумела, навошта гэта трэба».
Паводле дадзеных статыстыкі, гандаль Беларусі найбольш сярод партнэраў па Мытным саюзе завязаны на гэты саюз: летась траціна беларускага экспарту прыпадалі на краіны саюзу (Казахстан і Расею), ў той час як у Казахстана гэтая доля складала 7%, у Расеі – 8%.