Барадулін выйшаў у інтэрнет
У народнага паэта Рыгора Барадуліна з’явіўся свой афіцыйны сайт.
Сайт baradulin.by на грамадскіх пачатках стварыў журналіст Глеб Лабадзенка.
Структура праекта стандартная для большасці сайтаў, прысвечаных творчасці таго ці іншага пісьменніка. Гэта раздзелы «Біяграфія», «Вершы», «Фота» і «Прэса».
«Разынкі» дзве. Раздзел «Відэа» ўтрымлівае цікавыя архіўныя кадры.
Наведвальнікі могуць паглядзець вечарыну з нагоды 70-годдзя Васіля Быкава, якую вёў Барадулін. А таксама невялічкі відэафрагмент, у якім да дзядзькі Рыгора завітаў Уладзімір Някляеў.
У раздзеле «Кнігі» прадстаўлены выданні паэта ў электронным фармаце, дададзеныя са згоды аўтара і стваральнікаў сайта kamunikat.org.
Цікава, што дагэтуль у сеціве існуе сайт baradulin.ru. На ім прадстаўлена біяграфія народнага паэта, сціслы бібліяграфічны спіс, аналіз некаторых твораў Барадуліна, дзесятак фотаздымкаў, а таксама багата вершаў.
Новы праект ужо перагнаў канкурэнта па аб’ёму матэрыялаў. Але пры ўвядзенні ў пошук «сайт рыгора барадуліна» ці «рыгор барадулін сайт» «google» па-ранейшаму выдае першым радком «рускага Барадуліна».
«Беларускі» бачны толькі на больш далёкіх пазіцыях. Зрэшты, новы праект яшчэ толькі набірае абароты.
Лабадзенка абяцае дадаваць на сайт матэрыялы, дасланыя чытачамі.