Запрацаваў сервіс праверкі беларускай арфаграфіі
LanguageTool працуе з трыма дзясяткамі моваў.
У сервісе праверкі арфаграфіі і стылю LanguageTool стала даступная беларуская мова. Яна з'явілася ў версіі праграмы 2.4.
Каб праверыць правільнасць набранага тэксту, трэба адкрыць сайт http://www.languagetool.org/, абраць унізе вакна беларускую мову і ўставіць тэкст.
Выглядае на тое, што пакуль праграма правярае ў беларускім тэксце толькі арфаграфію, бо памылак стылю не бачыць зусім.
Слоўнік праграмы ўключае ў сябе словы на «наркамаўцы», таму словы, напісаныя на «тарашкевіцы», пазначаюцца як памылковыя.
LanguageTool 2.4 існуе як анлайн-сервіс, а таксама як асобная праграма і як дадатак да браўзэра Mozilla.
Падобны сэрвіс здаўна прапануе афлайн-версія праграмы «Белазар», створаная праграмістам Алегам Азароўскім.