Сваякі зьніклых перадалі ў пракуратуру вынікі свайго расьсьледаваньня
Сваякі зьніклых палітыкаў перадалі генэральнаму пракурору Беларусі дакумэнт, угрунтаваны на выніках грамадзкага расьсьледаваньня гэтых гучных спраў.
Сваякі выкрадзеных у Беларусі апазыцыйных палітыкаў Зінаіда Ганчар, Ірына Красоўская, Сьвятлана Завадзкая, Вольга Завадзкая, а таксама іх юрыдычныя прадстаўнікі Гары Паганяйла і Алег Воўчак перадалі генэральнаму пракурору Беларусі дакумэнт, угрунтаваны на выніках грамадзкага расьсьледаваньня гэтых гучных спраў.
Перададзены ў пракуратуру дакумэнт фактычна зьяўляецца абвінаваўчай высновай. Да яго прыкладаецца хадайніцтва.
«У хадайніцтве выкладзеная просьба, каб факты, адлюстраваныя ў дадзеных дакумэнтах, былі ўважліва вывучаныя і знайшлі рашэньне ў межах кампэтэнцыі генэральнай пракуратуры. Счакаем месяц, а пасьля будзем вырашаць, чаму пракуратура гуляецца з намі ў хованкі. Гэта наш апошні зварот у генэральную пракуратуру на нацыянальным узроўні. Пасьля гэтага мы пяройдзем на стадыю рэалізацыі міжнародных мэханізмаў для вырашэньня праблемы зьніклых», — заявіў юрыдычны прадстаўнік сям’і Завадзкіх Гары Паганяйла.
Беларускія праваахоўчыя органы так і не далі адказу, хто выкраў Віктара Ганчара, Юрыя Захаранку, Анатоля Красоўскага, Зьмітра Завадзкага. Міжнародныя арганізацыі — ААН, АБСЭ, Рада Эўропы — падазраюць у далучнасьці да гэтых зьнікненьняў высокапастаўленых беларускіх чыноўнікаў.