Крэмль патрабуе ад Кіева плаціць за газ, які спажываюць «ДНР» і «ЛНР»
Раней Украіна прыпыніла падачу газу на акупаваныя тэрыторыі, а Расія пачала пампаваць туды паліва наўпрост праз Луганск.
Пасля захопу Дэбальцава Расія знайшла новую прычэпку да Украіны. На фота: расійскія сілы вядуць абстрэл украінскай тэрыторыі з ракетных установак «Град». Фота buzzfeed.com.
Учора пытанню паставак газу на Данбас было прысвечана паседжанне Рады бяспекі Расіі на чале з Пуціным. Раней за кожнай абвешчанай нарадай такога высокага ўзроўню ішло нейкае рэзкае рашэнне.
Прэм’ер-міністр Расіі Дзмітрый Мядзведзеў заявіў, што за паліва, якое Масква пастаўляе ў Данецкую і Луганскую вобласць, павінен плаціць Кіеў.
«Паводле дзеючых кантрактных абавязанняў Кіеў папярэдне аплочвае расійскі газ. З сённяшнімі аб’ёмамі нашых паставак, уключна з «ДНР» і «ЛНР», украінскіх грошай хопіць усяго на некалькі дзён. За газ трэба плаціць», — напісаў Мядзведзеў на сваёй старонцы ў Фэйсбуку.
З аўторка пастаўкі прыроднага газу на Данбас спынілася з-за разбурэння інфраструктуры. Пасля гэтага Расія пачала пастаўкі паліва на Данбас наўпрост праз Луганск, а не праз агульную ўкраінскую сетку.
Кіеў аказваецца ў патавай сітуацыі. Расія патрабуе з яго аплаты за пастаўлены ў Данецк і Луганск газ. У той жа час ДНР і ЛНР паставак газу не аплачваюць. Між тым Масква і так бярэ з Кіева за газ па найвышэйшых у Еўропе тарыфах, што паставіла Украіну на мяжу банкруцтва.
Не выключана, што ў бліжэйшыя дні Еўропу чакае жорсткі газавы крызіс.