МЗС Турцыі выклікаў пасла РФ з-за ўдараў па вёсцы ў Сірыі
МЗС Турцыі выклікаў пасла РФ у Анкары Андрэя Карпава і заявіў яму пратэст у сувязі з авіяўдарамі расейскіх вайскоўцаў па туркменскім селішчы Байырбуджак на поўначы Сірыі.
У заяве турэцкага знешнепалітычнага ведамства гаворыцца, што расійскія ваенныя бамбяць тэрыторыю, якая знаходзіцца ў непасрэднай блізкасці ад Турцыі.
У тым ліку, па інфармацыі турэцкага боку, удары прыйшліся па селішчы Байырбуджак, дзе жывуць сірыйскія туркмены.
«Высветлілася, што расейскія самалёты інтэнсіўна бамбавалі туркменскія вёскі ў рэгіёне Байырбуджак на паўночным захадзе Сірыі паблізу нашага пагранперахода Яйладаг […] Было падкрэслена, што дзеянні расейскага боку не з'яўляюцца барацьбой з тэрарызмам, ажыццяўляюцца бамбардзіроўкі мірных туркменскіх вёсак, і гэта можа прывесці да сур'ёзных наступстваў», — гаворыцца ў заяве МЗС Турцыі.
Анкара запатрабавала ад Расіі «неадкладна спыніць аперацыю».
Як стала вядома ў чацвер, расійскі міністр замежных спраў Сяргей Лаўроў 25 лістапада прыязджае ў Турцыю з візітам. Плануецца, што ён прыме ўдзел у пасяджэнні расійска-турэцкай Сумеснай групы стратэгічнага планавання.