Сёння ў католікаў — Святы Мікалай
6 снежня каталікі абодвух абрадаў ушаноўваюць памяць святога Мікалая, біскупа Мірлікійскага. Праваслаўны свет, што карыстаецца юліянскім календаром, ушаноўвае яго 19 снежня.
Помнік святому Мікалаю ў Дэмрэ (Міра), Турцыя. Фота: (CC) Simm / Wikipedia
Гэта адзін з найбольш шанаваных хрысціянскіх святых. Пра жыццё святога Мікалая вядома няшмат. Знаем, што святы Мікалай доўгія гады быў біскупам у Мірах, правінцыя Лікія, у Малой Азіі. Браў удзел у Першым Сусветным Саборы (325 г.) у Нікеі. Памёр каля 345 года.
Усё сваё жыццё прысвяціў справе міласэрнасці для душы і цела. Таямніца ягонага вялікага культу сярод хрысьціян у тым, што ён для ўсіх стаў сімвалам ахвярнай любові да бліжняга і спачувальнай міласэрнасці. Пасьля смерці Бог праславіў яго выключным дарам раблення цудаў, і таму гэта святога велічаюць Цудатворцам.
Лічыцца, што менавіта святы Мікалай (у ЗША ды іншых заходніх краінах ён стаў правобразам Санта-Клаўса) прыносіць падарункі на Каляды. Таму настаў самы час дзецям пісаць да яго лісты.