Камень, які ўпаў на хлеў у Нідэрландах, — аднагодак Сонечнай сістэмы
Камень, які паўгода таму ўпаў на хлеў у Нідэрландах, аказаўся метэарытам узростам 4,5 мільярды гадоў, выявілі навукоўцы. Пра гэта паведамляе РІАН са спасылкай на Dutch News.
Паўкілаграмовы аскепак прабіў дах хлява ў вёсцы Брук (правінцыя Паўночная Галандыя) 11 студзеня. Уладальнікі будынка знайшлі яго на наступную раніцу і перадалі спецыялістам з Музея прыродазнаўства ў Лейдане.
Пасля даследавання эксперты абвясцілі, што хандрытавы метэарыт, які ўпаў у вёсцы, з'яўляецца аднагодкам Сонечнай сістэмы, якая ўзнікла каля 4,5 мільярда гадоў таму.
«Ён прыляцеў з раёна паміж Марсам і Юпітэрам, гэтая прастора поўная касмічнага смецця і мікрапланет», — паведаміў геолаг Леа Крыгсман.
Музей спадзяецца выкупіць метэарыт ва ўладальнікаў. Яго рынкавы кошт ацэньваецца ў адну тысячу еўра.
Гэта шосты зарэгістраваны нідэрландскі метэарыт. Пры гэтым навукоўцы мяркуюць, што аб'екты касмічнага паходжання падаюць на тэрыторыю краіны ў сярэднім кожныя два-тры гады, але часцяком застаюцца не выяўленымі.