Макей: З трыбун ААН і АБСЕ чуецца толькі нянавісць і пагрозы
Міністр замежных справаў Беларусі Уладзімір Макей выступіў на форуме «Мінскі дыялог», які праходзіць у гатэлі «Марыёт» на праспекце Пераможцаў.
Макей адзначыў, што на сёння мы бачым «татальную канфрантацыю» розных суб’ектаў сусветнай палітыкі. «Паглядзіце, у што пераўтварыліся трыбуны органаў, якія павінны рашаць пытанні бяспекі (Рады бяспекі ААН і Пастаяннай Рады АБСЕ). «З іх чуваць толькі словы нянавісці і пагрозы», — адзначыў міністр.
Па ягоных словах, Другая сусветная вайна найбольш моцны чыннік, які вызначае беларускую «генетычную памяць». «Нам і ў страшным сне не магло прысніцца, што недзе зусім побач з намі зноў будуць весціся баявыя дзеянні, зноў будуць гінуць людзі», — сказаў чыноўнік пра канфлікт ва Украіне.
«Мы ў Беларусі кожным нервам адчуваем накал цяперашняга сусветнага супрацьстаяння, якое адбіваецца на ўсіх сферах нашага жыцця», — адзначыў Макей. Па ягоных словах, размаўляць трэба пра супрацоўніцтва і развіццё, а не пра пагрозы.