Сінод РПЦ у Мінску рыхтуе «рашучы і цвёрды» адказ на дзеянні Канстанцінопаля
Руская праваслаўная царква абяцае цвёрда і рашуча адказаць на заявы Канстанцінопаля ў дачыненні да Украіны. Пра гэта ў чацвер паведаміў сакратар па міжправаслаўных адносінах аддзела знешніх царкоўных сувязяў Маскоўскага патрыярхата протаіерэй Ігар Якімчук, паведамляе ТАСС.
«У панядзелак у Мінску запланавана паседжанне Святога Сінода РПЦ і вышэйшы выканаўчы орган РПЦ дасць належную ацэнку таго, што адбылося сёння. Адказ будзе самым рашучым і цвёрдым, ён будзе адэкватны той сітуацыі, якая склалася», — сказаў прадстаўнік РПЦ.
Ігар Якімчук таксама падкрэсліў, што «рашэнне Канстанцінопальскага патрыярхата кананічна нікчэмнае».