Чаму для рускамоўнай версіі сайты дзяржаўных устаноў выкарыстоўваюць іконку расійскага трыкалора?
Пытанне ўзнікла ў чытача «Нашай Нівы»: чаму для рускамоўнай версіі многія сайты дзяржаўных устаноў і прадпрыемстваў выкарыстоўваюць іконку расійскага трыкалора? Прычым тут дзяржаўны сімвал іншай дзяржавы?
У Беларусі дзве дзяржаўныя мовы — беларуская і руская. Гэтыя дзве мовы прызнаныя дзяржаўнымі і паводле Канстытуцыі. Любым з'явам з характарыстыкай «дзяржаўны» надаецца сімвалізм канкрэтнай дзяржавы, да якой яны маюць дачыненне.
Зыходзячы з таго, што і руская мова — мова краіны Беларусь, я зусім не разумею, чаму на беларускіх сайтах (у тым ліку дзяржаўных органаў, прадпрыемстваў і ведамстваў) адна з дзяржаўных моў Беларусі пазначаецца сцягам не Беларусі, а іншай замежнай краіны (трыкалорам суседняй краіны). Што гэта за бязглуздзіца? Гэта ўжо проста не патрыятычна і не канстытуцыйна.
Менавіта так пазначана руская мова, напрыклад, на сайце падведамнай прэзідэнту РБ і кіраўніцтву спраў прэзідэнта Дзяржаўнай установы «Галоўнае гаспадарчае ўпраўленне».
Скрыншот галоўнай старонкі сайта Галоўнага гаспадарчага ўпраўлення.
А гэта галоўная старонка партала Кіраўніцтва спраў прэзідэнта.