У ЗША самалёт скінуў паліва на школы, пацярпела больш за 40 чалавек
Колькасць пацярпелых у выніку скіду авіяпаліва экіпажам пасажырскага самалёта авіякампаніі Delta Air Lines над мястэчкам Кадахі пад Лос-Анджэласам (штат Каліфорнія) вырасла да 44 чалавек, піша tass.ru.
Паліва трапіла на тэрыторыю чатырох пачатковых школ. Агульная колькасць пацярпелых складае 44 чалавекі, у тым ліку не менш за 20 дзяцей. Усе яны адмовіліся ад шпіталізацыі пасля першай медыцынскай дапамогі.
Федэральнае авіяцыйнае ўпраўленне (ФАУ) ЗША праводзіць расследаванне абставінаў інцыдэнту, які здарыўся падчас рэйсу Лос-Анджэлас - Шанхай авіякампаніяй Delta Air Lines. Экіпаж падаў сігнал трывогі пасля вылету з аэрапорта Лос-Анджэласа, самалёт вярнуўся ў пункт вылету і прызямліўся без здарэнняў.
«Існуюць правілы скіду паліва з самалётаў. Гэтыя правілы патрабуюць скідаць паліва над загадзя адведзенымі ненаселенымі зонамі, звычайна на вялікай вышыні, каб паліва распылілася да сутыкнення з зямлёй», - патлумачыла ФАУ.
Delta патлумачыла дзеянні экіпажа надзвычайнай сітуацыяй, якая патрабавала пазбавіцца ад паліва для зніжэння масы самалёта перад пасадкай.