У Крупскім раёне ратавальнікі выцягнулі з балота каня
Незвычайная сітуацыя адбылася 9 чэрвеня ў лесе каля Дакудава, паведамляе 112.by.
112.by
Мясцовы жыхар ехаў на падводзе па добра знаёмай лясной дарозе. У нейкі момант конь уграз і праваліўся ў балота. Уласнымі намаганнямі мужчына не змог справіцца, спатрэбілася дапамога ратавальнікаў.
Да месца выкліку выехала найбліжэйшае падраздзяленне МНС у складзе камандзіра аддзялення Аляксандра Цягліка і кіроўцы Уладзіміра Прыгожанкі. Байцы абвязалі каня пажарнымі рукавамі, прывязалі да тэхнікі, па меры магчымасці дапамагалі рукамі, каб не траўмаваць жывёлу.
Так паціху вызвалілі стомленую і напалоханую жывёлу «з палону». Конь не пацярпеў.
Гаспадар ўдзячны выратавальнікам. А што кажуць самі ратавальнікі? Як заўсёды, сціпла і нешматслоўна: «Гэта наша праца».