У Смаргонскім раёне дачнік паліў смецце. Яму далі 13 тысяч рублёў штрафу
Увесну жыхар Смаргонскага раёна спальваў на сваім дачным участку смецце. Моцны вецер распаўсюдзіў полымя вогнішча на суседнія гаспадарчыя пабудовы і нежылы дом. На землях сельгаспрызначэння на плошчы 40 тыс. кв м выгарэла сухая расліннасць, паведамляе kraj.by.
Памер нанесенай навакольнаму асяроддзю шкоды перавысіў 17 тыс. рублёў.
Згодна з заключэннем раённага аддзела па надзвычайных сітуацыях, прычынай пажару стала парушэнне дачнікам правілаў бяспекі пры развядзенні вогнішча. Пракурор Смаргонскага раёна прад'явіў да яго пазоў у інтарэсах дзяржавы.
Суд Смаргонскага раёна задаволіў патрабаванні пракурора — з адказчыка з улікам яго матэрыяльнага становішча спагнаныя ў кошт кампенсацыі шкоды 12,9 тыс. рублёў.