Доктарцы, якая сумленна расказвала пра COVID, прыйшлося з'ехаць з Беларусі
Дар'я Чэхава (Плоткіна), svaboda.org
Доктара з прыёмнага аддзялення 10-й гарадской клінічнай бальніцы Дар'ю Чэхаву (Плоткіну) у Twitter чыталі каля 13 тысяч чалавек. Усю пандэмію яна дзялілася сваімі назіраннямі аб COVID-19 і тактыцы беларускага Міністэрства аховы здароўя ў пытанні барацьбы з гэтым захворваннем, піша Еўрарадыё.
У чацвер вечарам Плоткіна паведаміла, што была вымушана тэрмінова з'ехаць з краіны.
Паводле яе слоў, у РУУС яе выклікалі ў сувязі з яе твітам аб згвалтаваннях затрыманых. Потым выклікалі яшчэ раз і паведамілі, што яе справа перададзеная ў Следчы камітэт. Затым быў званок з СК.
«Так што ў мяне не засталося варыянтаў. Альбо публічнае прыніжэнне (хоць я не лічу, што я паступіла няправільна, асвятляючы тыя ці іншыя падзеі) і матаць тэрмін (каб іншым непанадна было), альбо хутка з'язджаць. Я пакінула жыллё, машыну, працу, сваю сям'ю — усё, што ў мяне было», — піша доктар.
Яна кажа, што пісала ў сацсетках дзеля праўды, каб людзі разумелі, што каранавірус — гэта небяспечна, а не як кажуць па тэлевізары, што гвалт у дачыненні да мірных грамадзян — гэта дрэнна, што замоўчваць такія выпадкі нельга.
Доктар прызналася, што шкадуе аб адным — што вымушана з'язджаць у разгар пандэміі і не зможа лячыць людзей. Краіну, у якую яна з'ехала, Плоткіна не назвала, але сказала, што раней там ніколі не была. Плануе вучыць мову і працаваць доктарам. Кажа, што вельмі сумуе па калегах і пацыентах.