Маланка забіла 15 цялят у Лоеўскім раёне
Статак належыць прадпрыемству «Малінаўка-Агра».
Каля 16 гадзін 1 чэрвеня ў Лоеўскім раёне (Гомельская вобласць) разрадам маланкі забіла 15 цялят, паведаміў БелаПАН прэс-сакратар абласнога ўпраўлення МНС Руслан Габрылёў.
Падчас навальніцы цяляты прадпрыемства «Малінаўка-Агра» ва ўзросце ад аднаго да паўтара гадоў знаходзіліся ў летнім лагеры для ўтрымання буйной рагатай жывёлы.
Прыкладна праз гадзіну ў вёсцы Глазаўка Буда-Кашалёўскага раёна Гомельскай вобласці моцным ветрам было пашкоджана больш як 20 пабудоў. Пацярпелых няма, вядуцца аднаўленчыя работы.