БЕЛ Ł РУС

Прысуд журналісткам «Белсата» Андрэевай і Чульцовай за стрым з плошчы Перамен пакінулі без зменаў. Яны застаюцца за кратамі

23.04.2021 / 11:22

Nashaniva.com

23 красавіка Мінскі гарадскі суд разгледзеў апеляцыйную скаргу на прысуд Дар'і Чульцовай і Кацярыне Бахвалавай — журналісткам «Белсата», якія 15 лістапада 2020-га вялі стрым з плошчы Перамен, піша Tut.by.

Дар'я і Кацярына падчас пасяджэння ў лютым. Фота Надзеі Бужан

У той дзень іх затрымалі, затым асудзілі на сем сутак адміністрацыйнага арышту па артыкуле 23.34 КаАП, а пазней распачалі ў дачыненні да журналістак крымінальную справу. У лютым прайшоў суд. Суддзя Наталля Бугук прысудзіла кожную да двух гадоў пазбаўлення волі.

Разгляд апеляцыі запланаваны на 10 раніцы. Ні Кацярына Бахвалава, ні Дар'я Чульцова ў працэсе асабіста не ўдзельнічаюць. Пад вартай яны знаходзяцца ўжо больш за пяць месяцаў. Цяпер — у следчай турме ў Жодзіне.

Журналістак абвінавачвалі па ч. 1 арт. 342 Крымінальнага кодэкса — «Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх». 

Дар'ю Чульцову па-ранейшаму абараняе Аляксандр Хаецкі. У Кацярыны Бахвалавай новы абаронца — Андрэй Мачалаў: яе ранейшага адваката Сяргея Зікрацкага ў сакавіку пазбавілі ліцэнзіі.

У дарадчым пакоі судовая калегія правяла крыху больш за 20 хвілін.

Пасля гэтага яна абвясціла сваю пастанову: пакінуць прысуд Кацярыне Бахвалавай (Андрэевай) і Дар'і Чульцовай без змены.

За сваю працу журналісткі правядуць у калоніі агульнага рэжыму два гады.

Чытайце таксама:

Каментары да артыкула