Вярхоўны суд прызначыў дату пасяджэння па ліквідацыі Беларускай асацыяцыі журналістаў
Вярхоўны суд распачаў грамадзянскую справу па пазове Міністэрства юстыцыі аб ліквідацыі грамадскага аб'яднання «Беларуская асацыяцыя журналістаў».
Папярэдняе судовае пасяджэнне прызначана на 11.00 11 жніўня ў будынку Вярхоўнага суда.
Падстава для ліквідацыі палягае ў тым, што ГА БАЖ не выправіла парушэнні, выяўленыя Мінюстам падчас праверкі, распачатай у чэрвені 2021 года. Кіраўніцтва арганізацыі катэгарычна нязгоднае з такімі высновамі.
14 ліпеня ў офісе БАЖ без прысутнасці прадстаўнікоў арганізацыі сілавікі правялі чарговы ператрус, пасля якога офіс быў апячатаны і доступ у яго заблакаваны да гэтага часу.
Копіі пратаколаў ператрусу не ўручаліся. Пералік адабранай маёмасці не вядомы. Таксама ў гэты дзень былі заблакаваныя аперацыі на банкаўскім рахунку арганізацыі, паведамляе прэс-служба Асацыяцыі журналістаў.