81‑гадовую пенсіянерку з Магілёва аштрафавалі за «абразу Лукашэнкі»
Ала Няўмоева паспрачалася з камунальнікамі, калі выкідала смецце. Тыя запісалі яе прамову на відэа і выклалі ў TikTok. Суд прызнаў пацярпелым Аляксандра Лукашэнку. Пасяджэнне ў судзе Кастрычніцкага раёна Магілёва адбылося 11 жніўня, паведамляе «Радыё Свабода».
Алу Няўмоеву ведаюць старажылы магілёўскага дэмакратычнага руху, чыя актыўная дзейнасць прыпадала на 1990-я. Цяпер ёй 81 год, у яе інваліднасць 2‑й групы. А гісторыя, якая скончылася судом, здарылася яшчэ ў красавіку.
З матэрыялаў справы: «Няўмоева Ала Фёдараўна, маючы намер на здзяйсненне злачынства супраць парадку кіравання (ч. 1 арт. 368 КК), у прысутнасці іншых асобаў публічна і наўмысна выказала ў вуснай форме ненарматыўныя выразы, якія абразілі гонар і годнасць прэзідэнта Беларусі ў сувязі з ажыццяўленнем ім сваім паўнамоцтваў».
Як заявіла жанчына на першым пасяджэнні 4 жніўня, усё пачалося з таго, што яна пайшла выкінуць смецце да кантэйнераў. Туды ж пад’ехалі супрацоўнікі «Спецаўтапрадпрыемства». Смяцяр пачаў задаваць пытанні і здымаць на камеру. Па сутнасці, правакаваў, адзначыла яна ў судзе.
Ала Няўмоева прызнала, што сапраўды выкарыстала нецэнзурную лексіку ў адрас Лукашэнкі. Але ўдакладніла, што яе проста давялі.
«Усё гаварыла нармальна спачатку, а ў канцы нервы не вытрымалі, што я б’юся, а нікому нічога не патрэбна. Мацюкі выкарыстала, так. Але заўваг мне ніхто не рабіў. Не справілася з эмоцыямі», — паскардзілася пэнсіянерка.
Тым не менш афіцыйна пацярпелым у крымінальнай справе аб абразе на сметніку паблізу Віцебскага праспекта, 28 прызналі Лукашэнку.
Суддзя Жанна Пушкіна прысудзіла мінімальна магчымае пакаранне — 30 базавых (870 рублёў).
За апошні час гэта першы выпадак, калі крымінальная справа за абразу першай асобы дзяржавы скончылася матэрыяльным спагнаннем, а не абмежаваннем ці пазбаўленнем волі.