У Карэліі арыштавалі брыгадзіра беларускіх рабочых, што памерлі ад сурагату алкаголю
Брыгадзіра беларускіх рабочых, якія атруціліся сурагатным алкаголем, арыштавалі на два месяцы па падазрэнні ў прычыненні смерці па неасцярожнасці двум і больш асобам, піша ТАСС.
Паводле следства, брыгадзір — 31-гадовы грамадзянін Беларусі — прывёз з сабой з Беларусі кантрафактную спіртазмяшчальную вадкасць, у складзе якой утрымліваўся метылавы спірт.
«Не пераканаўшыся ў яе бяспецы, ён перадаў сваёй брыгадзе алкаголь, у выніку чаго пяць чалавек памерлі ад атручвання», — гаворыцца ў паведамленні СК.
Трагедыя здарылася 22 жніўня. Восем жыхароў Беларусі, якія працавалі на адным з прадпрыемстваў у Пудажскім раёне Карэліі, выпілі сурагатны алкаголь. Пяцёра памерлі.