МЗС Аўстрыі выказалася наконт затрымання прэс-сакратара А1
Навіна пра затрыманне прэс-сакратара беларускага офіса аўстрыйскай кампаніі А1 дайшла да Міністэрства замежных спраў Аўстрыі. У суботу яны заявілі, што «асуджаюць зневажальныя дзеянні беларускіх уладаў». Таксама міністэрства заявіла, што вельмі занепакоенае арыштам прэс-сакратара.
Фота: probusiness.io
«Асноўныя правы і свабоды ўсіх людзей павінны быць заўжды абароненыя, — цытуе аўстрыйскае выданне kurier.at суботнюю заяву МЗС. — Мы інтэнсіўна працуем па дыпламатычных каналах і знаходзімся ў цесным супрацоўніцтве з аўстрыйскай кампаніяй, каб аказаць тут падтрымку».
Нагадаем, «пакаяннае відэа» з удзелам Мікалая Брэдзелева з'явілася ў праўладных тэлеграм-каналах у пятніцу. У ім, відавочна пад прымусам, прэс-сакратар А1 заявіў, што ён нібыта зліваў інфармацыю Антону Матольку.
Таксама ўчора стала вядома пра затрыманне дырэктара па маркетынгу «Хёндэ Аўтаград». Відэа з ім таксама з'явілася на праўладных тэлеграм-каналах.